Praz Armuzski praliŭ u piatnicu prajšoŭ tolki adzin tankier
Telekanał CNN paviedamlaje, što 10 krasavika praz Armuzski praliŭ prajšoŭ tolki adzin naftavy tankier, što śviedčyć pra istotnaje źnižeńnie marskoha trafiku ŭ hetym stratehična važnym rehijonie.
Sudna prachodzić praz Armuzski praliŭ 8 krasavika 2026 hoda. Fota: Shady Alassar/Anadolu via Getty Images
Pavodle źviestak sistemy adsočvańnia sudnaŭ MarineTraffic, hety tankier znachodziŭsia pad sankcyjami ZŠA i išoŭ pad ściaham Batsvany. Žurnalisty, praŭda, adznačajuć, što inšyja karabli taksama mahli prachodzić praz praliŭ, ale nie pieradavać sihnały AIS, tamu ich ruch moh zastacca niezaŭvažanym.
Taksama paviedamlajecca, što jašče niekalki sudnaŭ roznych typaŭ (ale nie tankiery) pad ściahami Indyi i Panamy prajšli praz hety rehijon: adno vyjšła ŭ bok Amanskaha zaliva, dva nakiroŭvalisia ŭ Piersidski zaliŭ.
Žurnalisty padkreślivajuć, što ŭ zvyčajnych umovach praz Armuzski praliŭ štodzionna prachodziać kala 100 i bolš sudnaŭ, i jon zastajecca klučavym maršrutam dla suśvietnych pastavak nafty. Tamu rezkaje skaračeńnie ruchu vyklikaje tryvohu na suśvietnych rynkach i moža paŭpłyvać na ceny na naftu.
Ekśpierty papiaredžvajuć, što kali trafik praz praliŭ nie vierniecca da zvyčajnaha ŭzroŭniu, heta moža mieć surjoznyja nastupstvy dla hłabalnaj ekanomiki.
Čytajcie taksama:
Tramp zapatrabavaŭ ad Irana spynić spahaniać płatu za prachod sudnaŭ praz Armuzski praliŭ
Tramp zajaviŭ, što dziejańni Irana ŭ Armuzskim pralivie nie adpaviadajuć damoŭlenaściam