U Biełaviežskaj puščy praviaduć hučny technarejv. Ci nie buduć panikavać źviary i ci ŭsiedziać na jajkach ptuški?

Biełarusy spračajucca ŭ sacsietkach: ci dapuščalnyja načnyja viečarynki z hučnaj elektronnaj muzykaj u zapaviednaj zonie? Nahodaj staŭ technarejv, jaki projdzie 18 krasavika ŭ Biełaviežskaj puščy, u majontku Dzieda Maroza, piša vydańnie «Anłajnier».

Zdymak ilustracyjny. Fota: «Anłajnier»

Pačniecca viečarynka a 9‑j hadzinie viečara i praciahniecca da druhoj hadziny nočy. Ad hałoŭnaj bramy Nacyjanalnaha parka da placoŭki i nazad haściej budzie vazić biaspłatny tranśfier.

Voś jak sami arhanizatary anansujuć mierapryjemstva:

«MAHIJA LESU I ENIERHIJA TECHNA

18 krasavika Biełaviežskaja pušča pieratvorycca ŭ epicentr elektronnaj muzyki. My zaprašajem vas na ŭnikalny technarejv u samym sercy lehiendarnaha lesu — u majontku Dzieda Maroza! Ujavicie: viekavyja drevy, načnaja iluminacyja kazačnaj siadziby i mahutnyja bity, što pranizvajuć cišyniu nočy. Heta nie prosta viečarynka, heta pahružeńnie ŭ inšuju realnaść».

Adnak u sacsietkach na technarejv adreahavali nieadnaznačna. Mnohija pieražyvajuć adnosna taho, jak takoje šumnaje mierapryjemstva adabjecca na žyviołach puščy:

«Zaraz viasna, hniezdavańnie ptušak, hon mnohich žyvioł… Jakija rejvy z mahutnym hukam?»

«Ptuški buduć u zachapleńni, astatnija źviarki taksama ŭ ekstazie».

«U zapaviedniku hrukat techna ŭ pieryjad hniezdavańnia».

«Lublu rejvy, lublu techna, lublu open-ejry, ale ryli… U Biełaviežskaj puščy — heta ŭžo tu mač».

Dastatkova zirnuć na kartu: majontak litaralna patanaje ŭ lesie. Navokał — ni zabudovy, ni «bufiernaj zony». Da najbližejšaj nievialikaj vioski — prykładna dva kiłamietry.

Ale jość i tyja, chto ličyć, što viečarynka nie pavinna naškodzić žyviołam, jakija nasialajuć miescy pobač z łakacyjaj jaje praviadzieńnia:

«Majontak Dzieda Maroza ŭžo hadoŭ z 20 napoŭnieny ludźmi. Tam zaŭsiody šumna, asabliva ŭ navahodnija śviaty. Jon nie ŭ lasnym huščary znachodzicca».

«Heta, napeŭna, nie budzie prachodzić u pryrodaachoŭnaj zonie. A tam, dzie dali dazvoł, napeŭna, na pastajannaj asnovie niešta dy prachodzić (ułasna, heta paznačana). A jakoje-niebudź śviata kštałtu viasiella moža akazacca našmat šumniejšym (z-za fiejervierkaŭ, naprykład)».

«Uzrovień huku na technarejvach zvyčajna składaje ad 100 da 120 decybiełaŭ. Streł z ružža ŭ siarednim stvaraje huk hučnaściu ad 140 da 170 dB. Uzrovień šumu ad udaru małanki (hrom) nadzvyčaj vysoki: u niepasrednaj blizkaści jon składaje kala 120—140 dB, što dasiahaje bolevaha paroha čałavieka. Pry asabliva blizkich udarach abo śpiecyjalnych umovach uzrovień hukavoha cisku moža karotkačasova pieravyšać 165—200. Pytańnie: ad čaho bolš imavierna spynicca serca biednaj žyvioły?»

«Mierapryjemstva nie ŭ valjerach z žyviołami płanujecca, usio pradumana. Miesca praviadzieńnia znachodzicca daloka ad žyvioł».

A što nakont hetaha mierapryjemstva dumaje zaołah?

«Horš za ŭsio toje, što ŭsio budzie prachodzić u načny čas. Kali dniom jašče žyvioły mohuć čakać niejkich rezkich hukaŭ, to ŭnačy jany całkam biezabaronnyja.

Majontak Dzieda Maroza znachodzicca ŭ samym centry puščy, tam vialikaja raznastajnaść vidaŭ. I praz toje, što sioleta rańniaja viasna, mnohija ptuški ŭžo siadziać na jajkach. A hučnaja muzyka moža spałochać samak, jany pakinuć hniozdy i bolš nie viernucca.

Jašče adzin momant, jaki mianie ŭstryvožyŭ, — toje, što ŭnačy pa darozie kala lesu budzie kursiravać tranśfier. Dzikija žyvioły aktyŭnyja ŭ hety čas, mohuć vychodzić na prajeznuju častku i tym samym pravakavać DTZ», — dzielicca pradstaŭnik kampanii «Dzikaja pryroda» Alaksandr Vinčeŭski.

Arhanizatary: «Admiena nie płanujecca»

Za kamientaryjem pa situacyi žurnalisty taksama źviarnulisia ŭ Nacyjanalny park «Biełaviežskaja pušča». I voś što tam adkazali:

«Zaraz razam ź Ministerstvam pryrody vyrašajem pytańni pa mierapryjemstvie, admiena nie płanujecca. Technarejv budzie prachodzić u rekreacyjnaj zonie, majontak Dzieda Maroza — heta turystyčny abjekt. Da zapaviednaj zony bolš za adzin kiłamietr. Da taho ž, tam stajać budynki, jakija buduć pahłynać šum. My zamieryli jaho ŭzrovień — usio ŭ miežach normy. U najbližejšy čas my damo ludziam bolš padrabiaznaje tłumačeńnie situacyi».

7 krasavika administracyja «Nacyjanalnaha parka «Biełaviežskaja pušča» vypuściła aficyjnuju zajavu:

«Pry padrychtoŭcy kulturna-vidoviščnaha mierapryjemstva «Techna-rejv» u Biełaviežskaj puščy pieršapačatkova byli ŭličanyja normy pryrodaachoŭnaha zakanadaŭstva. Vystupleńnie muzyčnych kalektyvaŭ adbudziecca ŭ centry rekreacyjnaj zony na turystyčnym abjekcie parka «Majontak biełaruskaha Dzieda Maroza». Jon addaleny ad zapaviednaj zony bolš čym na 1 km.

Bolš za toje, arhanizatary technična prapracavali sistemu raspaŭsiudžvańnia huku takim čynam, kab jon byŭ nakiravany ŭ centr placoŭki, na jakoj budzie prachodzić mierapryjemstva. Udzieł u im aryjencirovačna zmoža ŭziać nie bolš za 700 čałaviek.

Nacyjanalny park «Biełaviežskaja pušča» ŭ svajoj dziejnaści kirujecca pryncypami zachavańnia ŭnikalnych pryrodnych kompleksaŭ, fłory, faŭny i historyka-kulturnaj spadčyny terytoryi. Taksama z ulikam navukova abhruntavanaj dapuščalnaj rekreacyjnaj nahruzki i zachavańnia normaŭ pryrodaachoŭnaha zakanadaŭstva nacyjanalny park aktyŭna raźvivaje infrastrukturu padziejnaha turyzmu i masavaha adpačynku. 

U pryvatnaści, administracyja parka pašyraje sietku ekałahičnych i paznavalnych maršrutaŭ, arhanizuje roznyja fiestyvali, tematyčnyja śviaty, interaktyŭnyja prahramy i siezonnyja mierapryjemstvy. Heta spryjaje raźvićciu ŭnutranaha turyzmu, pavieličeńniu jaho ŭkładu jak u ekanomiku ŭstanovy, tak i dziaržavy ŭ cełym. Padziejny turyzm dazvalaje pryciahvać šyroki patok naviedvalnikaŭ, farmiravać viadomy brend terytoryi i raźvivać jaje biez škody dla pryrodaachoŭnaj misii. 

Pry praviadzieńni kulturna-vidoviščnaha mierapryjemstva «Techna-rejv» buduć realizavanyja ŭsie nieabchodnyja ŭmovy pa niedapuščeńni škody pryrodzie».

Kamientary da artykuła