Sielskuju haspadarku Dubrovienskaha rajona daručyli ratavać biznesmienu Baskinu

Vydańnie Plan B. piša pra novuju ideju Alaksandra Łukašenki pa vyratavańni prablemnaj sielskaj haspadarki ŭ Viciebskaj vobłaści. Sutnaść jaje ŭ tym, kab pryciahnuć paśpiachovych biznesmienaŭ i pieradać im pad kiravańnie cełyja ahrarnyja rajony abo struktury. Pry hetym jość užo i pieršaja łastaŭka.

Jaŭhien Baskin 

Pa infarmacyi Plan B., u ramkach piłotnaha prajekta ŭvieś ahrapramysłovy kompleks Dubrovienskaha rajona pieradali biznesmienu Jaŭhienu Baskinu, uładalniku hrupy kampanij «Siervaluks», bujnoha vytvorcy miasa kur-brojleraŭ. Dla hetaha navat stvaryli asobnuju kampaniju — «Dubroŭna Dejryz», jakaja budzie zajmacca raźvićciom miascovych haspadarak.

Ideja źjaviłasia paśla narady ŭ lutym, dzie Łukašenka zajaviŭ, što znajšoŭ «adkaznych ludziej» dla častki ahrapramysłovych abjadnańniaŭ vobłaści. Akramia Baskina, u prajekt uklučyli taksama inšych bujnych biznesmienaŭ i kiraŭnikoŭ dziaržpradpryjemstvaŭ.

«Na try struktury ja vam adkaznych ludziej znajšoŭ. Jakija dapamohu akažuć i spytajuć, i zapatrabujuć, i mianie prainfarmujuć… Voś vam, kažu, mužyki, syravinnyja zony. Try z šaści. Nu a na try sami znojdziecie. Heta buduć vašy pamočniki. Technałahična, finansava, arhanizacyjna. Ale jany buduć vam dapamahać, rekamiendavać», — raskazaŭ tady pra svaju miehazadumu Łukašenka.

Ciapier, jak spadziajucca miascovyja dubrovienskija ŭłady, «Siervaluks» Baskina budzie inviestavać u madernizacyju fiermaŭ, kuplu techniki i raźvićcio sielskaj haspadarki ŭ rajonie. Pry hetym abiacajuć nie skaračać rabotnikaŭ, a naadvarot — pavialičyć štat i zachavać sacyjalnyja harantyi.

U Dubrovienskim rajonie davoli vialiki ahrarny siektar: 9 haspadarak, kala 75 tysiač hiektaraŭ ziamli i kala 25 tysiač tolki bujnoj rahataj žyvioły, tamu ŭkładvać srodki daviadziecca istotna.

Aŭtar materyjału adznačaje, što dla biznesmiena heta moža być jak zručna (bo rajon adpaviadaje jaho biznes-intaresam), tak i składana — bo spatrebiacca značnyja vydatki, da taho ž budzie dadatkovy kantrol z boku ŭładaŭ i adciahvańnie resursaŭ ad asnoŭnaha biźniesu. Tamu nieviadoma, ci apraŭdaje siabie takaja rola «vyratavalnika».

Kamientary da artykuła