Startavaŭ novy siezon pryjomu zajavak na premiju Adamoviča
Biełaruski PEN raspačaŭ pryjom zajavak na premiju imia Alesia Adamoviča za tvory, apublikavanyja ŭ 2025 hodzie. Dla premii važna čałaviečaja hodnaść, svaboda dumki i tvorčaści ŭ samych składanych umovach, piša bellit.info.
Na premiju možna naminavać tvory, jakija dakumientujuć rečaisnaść, źbirajuć praŭdzivyja śviedčańni pra sacyjalna-palityčnaje žyćcio i aśviatlajuć aktualnyja dla čałaviečaj supolnaści prablemy, havorka pieradusim pra publicystyku ŭ samym šyrokim sensie hetaha słova.
Možna naminavać:
- — knihi
- — artykuły ŭ miedyja
- — padkasty
- — kina– i videaprajekty
Zajaŭki prymajucca da 20 krasavika. Dla padačy treba zapoŭnić huhł-formu. U vypadku techničnych prablem materyjały možna dasyłać na elektronny adras aj@penbelarus.org z temaj lista «Premija Adamoviča 2026/imia i proźvišča aŭtara/aŭtarki/aŭtaraŭ, nazva tvora».
Premija imia Alesia Adamoviča zasnavanaja ŭ 1995 hodzie i ŭručajecca za najlepšuju publicystyčnuju knihu hoda. Z 1996 łaŭreatami premii stali Siarhiej Piatroŭski, Ryhor Baradulin, Vital Taras, Alaksandr Stupnikaŭ, Ludmiła Chiejdarava, Ihar Hiermiančuk, Barys Chamajda, Hierman Kiryłaŭ, Žanna Litvina, Siarhiej Dubaviec, Michaś Skobła, Siarhiej Šupa.