56‑hadovy rasijski jachtsmien viarnuŭsia z kruhaśvietki i zapisaŭsia na front, kab raspracoŭvać drony. I zahinuŭ u pieršym šturmie
Siabry narakajuć, što navat zabrać jaho cieła z Charkaŭskaj vobłaści niejak nie atrymlivajecca.
Źniščany jachtsmien Michaił Hałavanaŭ
Z-reparcior rasijskaj «Kamsamolskaj praŭdy» Hryhoryj Kubaćjan raskazaŭ u telehramie pra harotny los svajho siabra Michaiła Hałavanava, čyja historyja dobra pakazvaje situacyju ŭ ciapierašnim rasijskim vojsku.
56‑hadovy jachtsmien Michaił Hałavanaŭ vyrašyŭ padpisać kantrakt z rasijskim Minabarony, kab raspracoŭvać drony i źniščać ukraincaŭ. Jamu paabiacali, što tak i budzie. Ale adrazu adpravili ŭ šturmaviki.
«Miša byŭ užo nie małady, ale lubiŭ Rasiju, pieražyvaŭ za jaje i spadziavaŭsia dapamahčy krainie. Jon byŭ technarom ź inžyniernym składam rozumu. Chacieŭ raspracoŭvać i źbirać drony. Jamu paabiacali, što tak i budzie. Ale jak tolki padpisaŭ kantrakt, trapiŭ na palihon, a potym u šturmavuju rotu. Jaho adpravili na zadańnie ŭ pasiołak Piasčanaje, i praź niekalki dzion Mišy nie stała: prylacieŭ varožy dron», — piša Kubaćjan.
Michaił Hałavanaŭ kaliści chadziŭ razam z žurnalistam Kubaćjanam na paruśniku «Kruzienštern» u Isłandyju, a ŭ 2020 hodzie ŭdzielničaŭ u kruhaśvietnaj ekśpiedycyi na paruśniku «Pałada». Ciapier jon zastaŭsia ŭ ziamli ŭ Charkaŭskaj vobłaści Ukrainy. Cieła viarnuć pakul niemahčyma.
«Da ŭkraincaŭ pytańniaŭ niama, jany vorahi. U mianie jość pytańnie da baćkoŭ-kamandziraŭ: navošta ž tak?! Navošta čałavieka ŭ 56 (!) hadoŭ adpraŭlać na šturm, ź jakoha jon nie vierniecca? Kali jon moh by prynosić karyść u techničnych pytańniach, u jakich vydatna raźbiraŭsia! Heta, viadoma, pytańnie rytaryčnaje. Adkazvać nie treba», — pieražyvaje žurnalist.