U Niderłandach padčas prakładańnia kanalizacyi znajšli frahmient karabla vikinhaŭ

Padčas rabot pa prakładańni kanalizacyi na paŭdniovym uschodzie ad Amsterdama rabočyja trapili na niečakanuju znachodku — vialiki kavałak draŭniny, jaki moža pachodzić ad karabla vikinhaŭ. Z-za hetaha raboty daviałosia časova spynić, paviedamili ŭłady horada Viejk-biej-Durstede.

Fota: facebook.com/gemeentewijkbijduurstede

Pavodle najaŭnaj infarmacyi, znojdzieny frahmient maje daŭžyniu bolš za try mietry i, mahčyma, adnosicca da IX stahodździa. Kali heta paćvierdzicca, heta budzie pieršaja padobnaja archieałahičnaja znachodka ŭ hetym horadzie.

Fota: facebook.com/gemeentewijkbijduurstede

Histaryčna heta miesca viadomaje jak Dorestad — važny handlovy centr u VII—IX stahodździach, jaki złučaŭ skandynaŭskija ziemli z terytoryjami frankaŭ. Tamu znachodka moža być źviazanaja jak z handlem, tak i z napadami vikinhaŭ, jakija časta adbyvalisia ŭ hetym rehijonie.

Fota: facebook.com/gemeentewijkbijduurstede

Kab dakładna vyznačyć uzrost draŭniny, archieołaham jašče treba pravieści dadatkovyja daśledavańni, u tym liku analiz hadavych kolcaŭ dreva. Jość, praŭda, taksama viersija, što heta moža być nie karabiel vikinhaŭ, a bolš poźniaje sudna — naprykład, handlovy «koh» z XIII—XIV stahodździaŭ.

Znojdzieny frahmient užo aściarožna dastali i pieradali śpiecyjalistam dla dalejšaha vyvučeńnia. U budučyni jaho mohuć vystavić u miascovym muziei jak važnuju histaryčnuju relikviju.

Kamientary da artykuła