Rasijski hazavoz, padbity ŭ Mižziemnym mory, pahražaje ekałahičnaj katastrofaj

Rasijski tankier Arctic Metagaz, jaki znachodzicca pad sankcyjami, ciapier drejfuje ŭ Mižziemnym mory biez ekipaža. Na borcie tankiera vialikaja kolkaść zvadkavanaha pryrodnaha hazu, a taksama 450 ton mazutu i 250 ton dyzielnaha paliva, piša Ruskaja słužba Bi-bi-si.

Sudna ŭvachodzić u tak zvany «cieniavy fłot» Rasii — karabli, jakija vykarystoŭvajucca dla abychodu sankcyj i ruchajucca z adklučanymi transpondarami, kab schavać svaje maršruty.

Tankier byŭ mocna paškodžany, mahčyma, marskim dronam u pačatku sakavika kala Malty. Ekipaž z 30 čałaviek pakinuŭ tankier u vyratavalnych šlupkach, ich zabrała livijskaja bierahavaja achova, nichto nie paciarpieŭ. Na spadarožnikavych zdymkach vidać, što tankier tleje, nachileny na adzin bok, na levym borcie ŭ jaho vialikaja praboina, a vakoł sudna na pavierchni vady — tonkaja plonka, jakaja śviedčyć pra mahčymaje zabrudžvańnie.

Spačatku paviedamlałasia, što tankier zatanuŭ u vodach pamiž Livijaj i Maltaj paśla pažaru, ale paźniej vyśvietliłasia, što jon zastaŭsia na płavu i spačatku drejfavaŭ pamiž Maltaj i Italijaj. U apošnija dni jaho ciahnie da bierahoŭ Livii. Ciapier tankier znachodzicca prykładna za 83 km ad terytaryjalnych vod Italii i za 46 km ad pošukava-vyratavalnaj zony Livii.

Jeŭrapiejskija ŭłady ŭvažliva sočać za rucham sudna. Dzieviać mižziemnamorskich krain ES nakiravali sumiesny list u Jeŭrakamisiju z zaklikam pryniać miery z-za vysokaj ryzyki bujnoj ekałahičnaj katastrofy. Livijskija, italjanskija i maltyjskija ŭłady taksama zajavili pra vialikuju niebiaśpieku, bo tankier drejfuje niekiravany, a hruz na im moža lohka zaharecca.

Sakratar Rady ministraŭ Italii Alfreda Mantavana papiaredziŭ, što tankier moža «vybuchnuć u luby momant». Suśvietny fond dzikaj pryrody (WWF) abjaviŭ «maksimalnuju hatoŭnaść», papiaredziŭšy, što mahčymyja ŭciečki taksičnych hruzaŭ mohuć pryvieści da pažaraŭ i doŭhaterminovaha zabrudžvańnia mora, uklučajučy terytoryi z redkimi vidami i vidami pad achovaj.

Kamientary da artykuła