U pryharadzie Detrojta adbyŭsia napad na sinahohu sa stralaninaj
U amierykanskim horadzie Uest-Błumfiłd, pryharadzie Detrojta, 12 sakavika adbyŭsia napad na miascovuju sinahohu, padčas jakoha byli aŭtamabilny taran i stralanina, paviedamlaje Associated Press.
Skrynšot ź videa
Jak paviedamlajuć FBR i miascovyja miedyja, uzbrojeny vintoŭkaj złačynca na vialikaj chutkaści ŭrezaŭsia aŭtamabilem u budynak sinahohi. U vyniku sutyknieńnia mašyna zaharełasia, a ahoń pierakinuŭsia na samo zbudavańnie, z-za čaho nad dacham padniaŭsia husty dym.
Paśla avaryi napadnik adkryŭ «aktyŭnuju stralbu», adnak sustreŭ nieadkładny adpor: achova sinahohi zaŭvažyła złačyncu i ŭstupiła ź im u pierastrełku. U chodzie sutyknieńnia napadnik byŭ zastreleny na miescy — jaho śmierć paćvierdzili krynicy Associated Press i miascovaha telekanała WXYZ.
Ciapier pravaachoŭniki vyśviatlajuć asobu zabitaha i jaho matyvy.
Šeryf akruhi Oklend Majkł Bušar padkreśliŭ, što, akramia samoha terarysta, nichto ź ludziej nie atrymaŭ ranieńniaŭ. Tym nie mienš, incydent vyklikaŭ surjoznuju tryvohu ŭ rehijonie: palicyja zaklikała žycharoŭ paźbiahać rajona zdareńnia, a miascovyja škoły byli terminova pieraviedzieny ŭ «biaśpiečny režym» sa spynieńniem dostupu da ich starońnich asob.
Hetaja ataka adbyłasia ŭ pieryjad krajniaj napružanaści ŭ ZŠA, vyklikanaj uzbrojenym kanfliktam ź Iranam, jaki pačaŭsia ŭ kancy lutaha. Siłavyja struktury praciahvajuć pracu na miescy pažaru i stralaniny, kab vyklučyć najaŭnaść inšych pahroz.
Čytajcie taksama:
Kala pasolstva ZŠA ŭ Osła prahrymieŭ vybuch
U Novaj Ziełandyi mohuć abmiežavać vykarystańnie aŭtamabilaŭ z-za situacyi ź Iranam