Rasija kansultuje Iran, jak abychodzicca ź iranskimi dronami
Pavodle infarmacyi telekanała CNN sa spasyłkaj na krynicu ŭ zachodniaj raźviedcy, Rasija kansultuje Iran ab vykarystańni bieśpiłotnikaŭ-«šachiedaŭ» dla naniasieńnia ŭdaraŭ pa amierykanskich abjektach i krainach Piersidskaha zaliva.
Zdymak ilustracyjny. Fota: AP Photo / Efrem Lukatsky
Pavodle słoŭ krynicy CNN, Tehieran atrymlivaje ad Maskvy pieradavyja taktyčnyja pryjomy, jakija raniej vykarystoŭvalisia ŭ vajnie suprać Ukrainy.
Raniej paviedamlałasia, što Rasija pieradaje Iranu raźviedvalnuju infarmacyju pra mahčymyja mišeni. Adnak kansultacyi pa taktycy ŭdaraŭ ličacca novym uzroŭniem padtrymki. Heta vyklikaje ŭsio bolšuju zaniepakojenaść u zachodnich krain. Pry hetym krynica CNN nie raskryła inšych padrabiaznaściaŭ takoj dapamohi.
Była infarmacyja, što Rasija nibyta pieradavała Iranu danyja pra miescaznachodžańnie amierykanskich vajskovych abjektaŭ, u tym liku karabloŭ i samalotaŭ. Śpiecpasłańnik Donalda Trampa pa Blizkim Uschodzie Styŭ Uitkaf, praŭda, zajaŭlaŭ, što Uładzimir Pucin padčas razmovy z amierykanskim prezidentam admaŭlaŭ pieradaču takoj infarmacyi Iranu. Pavodle jaho słoŭ, toje ž samaje śćviardžaŭ i pamočnik Pucina Juryj Ušakoŭ.
Na fonie hetych padziej Ukraina nakiravała ŭ Iardaniju bieśpiłotniki-pierachopniki i hrupu śpiecyjalistaŭ pa BPŁA dla abarony amierykanskich vajskovych baz. Pavodle słoŭ Uładzimira Zialenskaha, ZŠA paprasili pra takuju dapamohu 5 sakavika, paśla čaho ŭkrainskaja kamanda była apieratyŭna nakiravanaja ŭ rehijon.
Čytajcie taksama:
Tramp pazvaniŭ Pucinu, kab abmierkavać Iran i Ukrainu