U adnym z rehijonaŭ Biełarusi ŭspyška niebiaśpiečnaha virusa — jak abaranicca
Chvaroba pačynajecca rezka.
Fota: vecteezy.com
U Mahilovie i Mahiloŭskim rajonie aktyvizavaŭsia niebiaśpiečny naravirus. Jak raskazali ŭ Mahiloŭskim centry hihijeny i epidemijałohii, u rehijonie fiksujucca hrupavyja vypadki zachvorvańnia, piša «Točka».
Pavodle słoŭ miedykaŭ, infiekcyja niebiaśpiečnaja dla ŭsich, ale asabliva dla dziaciej, pažyłych i asłablenych ludziej. Śpiecyjalisty dali tłumačeńni, jak nie zarazicca i što rabić, kali ŭžo zachvareli.
Što heta za virus
Naravirus — heta vostraja kišačnaja infiekcyja. Jon vielmi zarazny: dastatkova ŭsiaho 10 virusnych čaścic. Pry hetym virus doŭha žyvie ŭ navakolnym asiarodździ.
Krynica zaražeńnia — čałaviek: chvory abo bieśsimptomny nośbit. Virus vydzialajecca ź irvotnymi masami i naturalnymi vydzialeńniami.
Čałaviek zastajecca zaraznym padčas chvaroby i jašče niekalki tydniaŭ paśla vyzdaraŭleńnia.
Jak možna zarazicca
Šlachoŭ pieradačy ŭ patahiena niekalki. Samy časty — kantaktna-bytavy: praz brudnyja ruki, ručki dźviarej, krany, telefony, cacki.
Možna padchapić virus i praź ježu — drenna pamytuju harodninu abo pradukty, jakija hatavaŭ infikavany.
Taksama mahčymaja pieradača praz vadu — z vadajomaŭ, praz zaražany lod, niekipiačonuju vadu.
Jość navat pavietrana-kropielny šlach: kali ŭdychnuć mikrakropli irvotnych mas ź virusam. Hučyć žudasnavata, ale tak taksama byvaje.
Simptomy zaražeńnia i što rabić
Inkubacyjny pieryjad virusa — ad niekalkich hadzin da troch sutak.
Chvaroba pačynajecca rezka. Charakternyja prykmiety: młosnaść, irvota, vysokaja tempieratura, dyjareja, słabaść, blednaść.
Zvyčajna ŭsio prachodzić za adzin-try dni.
Ale kali arhanizm abiazvodžany, mohuć być surjoznyja nastupstvy.
Važna: antybijotyki pry naravirusie bieskarysnyja. Vakcyn niama, śpiecyfičnaha lačeńnia taksama. Samalačeńniem zajmacca ŭ hetym vypadku stroha zabaroniena — pry padazreńni na kišačnuju infiekcyju treba adrazu źviarnucca da ŭrača.
Dziaciej z apisanymi vyšej simptomami ŭ sadki i škoły lepš nie puskać.
Jak abaranicca
Hałoŭnaje praviła, kab zastavacca zdarovym, — hihijena. Važna myć ruki pierad pryniaćciem ježy, paśla vulicy i tualeta. Akramia taho, nieabchodna staranna pramyvać harodninu i sadavinu.
Miasa i inšyja stravy varta dobra pravarvać i prasmažvać. Pić varta tolki kipiačonuju vadu abo napoi ŭ fabryčnaj upakoŭcy. U basiejnach i vadajomach starajciesia nie hłytać vadu.