Minčuk raspyliŭ bałončyk u bok dziaŭčat, što śpiavali rasijski chit «Matuška-ziamla»
Viny jon nie pryznaŭ, jamu pahražaje da 10 hadoŭ.
Zdareńnie adbyłosia ŭ śniežni. Kampanija kaleh adpačyvała ŭ kaviarni na Partyzanskim praśpiekcie.
Bližej da paŭnočy dziaŭčaty sabralisia sychodzić. U harderobie jany stali śpiavać chit Taćciany Kurtukovaj «Matuška-ziamla». Da ich padyšoŭ naviedvalnik ustanovy ŭ stanie ałkaholnaha apjanieńnia i staŭ nibyta dakarać, što jany padtrymlivajuć Łukašenku, pišuć «Minsk-naviny».
Dziaŭčaty nibyta paćvierdzili heta i nakiravalisia ŭ bok prypynku hramadskaha transpartu čakać taksi.
Zatym da ich padyšoŭ mužčyna i raspyliŭ u ich bok hazavy bałončyk, paśla čaho syšoŭ. Kalehi, jakija padaśpieli, vyklikali chutkuju dapamohu. Adnu z paciarpiełych dastavili ŭ balnicu, dzie joj akazali nieabchodnuju dapamohu.
Chulihana paśla zatrymali, u dačynieńni da jaho raspačali kryminalnuju spravu.
Im akazaŭsia rodny dziadźka taho mužčyny, jaki spačatku vystaviŭ dziaŭčatam pretenzii adnosna śpievu. U momant ździajśnieńnia złačynstva jaho plamieńnik užo pajechaŭ dadomu.
— Abvinavačany raniej da kryminalnaj adkaznaści nie pryciahvaŭsia, — prakamientavała namieśnik prakurora Zavodskaha rajona Alena Alchoŭskaja. — Jamu vystaŭlena abvinavačańnie ŭ ździajśnieńni złačynstva, praduhledžanaha č. 3 art. 339 KK (asabliva złosnaje chulihanstva), sankcyja jakoha — da dziesiaci hadoŭ pazbaŭleńnia voli. Vinu hramadzianin nie pryznaŭ.
«Matuška-ziamla» adzin z chitoŭ u sučasnaj Rasii. Pieśniu vykonvaje Taćciana Kurtukova.
Na pieśniu stvorana dva klipy. U pieršym, 2022 hoda, Kurtukova vykonvaje pieśniu na biełym fonie, apranutaja ŭ narodny stroj. U viersii 2024 hoda videa śpiavačka pakazvajecca ŭ tradycyjnych kaściumach narodaŭ Rasii: burackim, kumykskim, nienieckim i ruskim.