Minsuviazi raspaviało, dzie ŭ Biełarusi paskoryŭsia internet, a dzie pryjdziecca pačakać
U troch abłaściach Biełarusi palepšyli 4G-suviaź.
Ministerstva suviazi i infarmatyzacyi paviedamiła ab značnym pašyreńni sietki LTE ŭ pačatku 2026 hoda. Asnoŭny akcent zrobleny na Viciebskuju, Mahiloŭskuju i Homielskuju vobłaści, dzie chutkaść pieradačy danych u sielskaj miascovaści vyrasła amal udvaja, piša «Minskaja praŭda».
Amal tysiača stancyj atrymała aphrejd
U kancy lutaha na 356 bazavych stancyjach Viciebskaj vobłaści radyjočastotny kanał u dyjapazonie 800 MHc pašyryli na 10 MHc. Heta padvoiła sumarny abjom radyjočastotnaha śpiektra.
Prapusknaja zdolnaść LTE vyrasła na 56,8%, a siaredniaja chutkaść pieradačy danych pavialičyłasia prykładna ŭ 1,8 raza — da 21 Mbit/s.
Na takuju ž chutkaść internetu mohuć raźličvać žychary Mahiloŭskaj i Homielskaj abłaściej.
Novyja mahčymaści adčujuć žychary bujnych haradoŭ — Mahilova, Viciebska, Homiela, Babrujska, Žłobina, Śvietłahorska — i nievialikich nasielenych punktaŭ, uklučajučy Turaŭ, Dobruš, Chocimsk, Buda-Kašalova, Biahoml, Naroŭlu, Aśvieju, Suraž, Doŭsk, Duniłavičy i inšyja.
Novyja płany pa paskareńni suviazi
Da kanca 2026 — pačatku 2027 hoda prapusknuju zdolnaść pavialičać dla ŭsich bazavych stancyj Minskaj, Bresckaj i Hrodzienskaj abłaściej.