U Techasie mužčyna rasstralaŭ natoŭp kala bara. ŚMI źviazvajuć heta z amierykanskimi ŭdarami pa Iranie
Ranicaj 1 sakavika ŭ centry Ościna, stalicy štata Techas, adbyłasia masavaja stralba. Kala paba Buford’s nieviadomy adkryŭ ahoń pa natoŭpie, u vyniku čaho dva čałavieki zahinuli, jašče nie mienš za 14 atrymali ranieńni. Troje paciarpiełych znachodziacca ŭ krytyčnym stanie.
Fota napadnika z nadpisam «Ułasnaść Ałacha» (Property of Allah) na bajcy. Skrynšot videa Fox News
Napadnik spačatku vioŭ ahoń z aŭtamabila, a zatym vyjšaŭ na vulicu ź vintoŭkaj. Palicyja likvidavała złačyncu na miescy. U siecivie ŭžo źjavilisia videazapisy jak momantu napadu, tak i niejtralizacyi strałka.
Telekanał Fox News paviedamlaje, što incydent rasśledujecca jak «mahčymy akt teraryzmu». Asoba napadnika identyfikavanaja — heta mihrant ź Sieniehała Ndyjaha Dyjańje (Ndiaga Diagne).
Na fotazdymkach, atrymanych žurnalistami, bačna, što na adzieńni złačyncy byŭ nadpis «Ułasnaść Ałacha» (Property of Allah). Taksama paviedamlajecca, što pad vierchnim adzieńniem na im, imavierna, była majka z vyjavaj ściaha Irana abo iranskaj simvoliki.
Raniej vydańnie The New York Post sa spasyłkaj na krynicy pisała, što na złačynstva mužčynu mahli padšturchnuć niadaŭnija ŭdary ZŠA pa Iranie. U mašynie padazravanaha byŭ znojdzieny Karan. Rasśledavańnie viadziecca z udziełam FBR.