Ruku minčanki zaciahnuła ŭ ciestaraskatvałku: vyzvalać žančynu daviałosia z dapamohaj bienzareza
Zvyčajnaja pracoŭnaja źmiena ŭ adnym ź minskich kafe ledź nie skončyłasia trahiedyjaj. Ruku rabotnicy zaciahnuła ŭ stalovyja valiki kuchonnaha abstalavańnia — kab dastać paciarpiełuju z pastki, spatrebiłasia śpiectechnika ratavalnikaŭ.
Skrynšoty videa MNS Biełarusi
Incydent adbyŭsia ŭdzień 1 sakavika 2026 hoda va ŭstanovie hramadskaha charčavańnia na vulicy Viery Charužaj, paviedamlaje aficyjny telehram kanał MNS Biełarusi.
Kali padraździaleńni ratavalnikaŭ prybyli na miesca zdareńnia, vyśvietliłasia, što adna z rabotnic ustanovy mocna paciarpieła z-za ŭłasnaj nieaściarožnaści padčas pracy na kuchni. Pravaje pieradplečča žančyny akazałasia ščylna zacisnutym pamiž valikami pramysłovaj ciestaraskatvalnaj mašyny. Samastojna vyzvalicca jana nie mahła.
Kab dastać ruku paciarpiełaj i pry hetym nie nanieści joj dadatkovych traŭmaŭ, bajcam MNS daviałosia prymianić śpiecyjalnuju techniku. Pry dapamozie bienzareza, a taksama ručnoj hidraŭličnaj avaryjna-vyratavalnaj pryłady śpiecyjalisty akuratna raścisnuli detali miechanizmu i paśpiachova debłakavali kaniečnaść.
Adrazu paśla vyzvaleńnia žančynu pieradali bryhadzie chutkaj dapamohi. Paciarpiełuju špitalizavali ŭ balnicu dla dalejšaha ahladu.