Mahčymuju bazu «Arešnika» pad Kryčavam uzmocniena achoŭvajuć kompleksami supraćpavietranaj abarony

Kala terytoryi byłoha vajskovaha aeradroma pad Kryčavam, dzie Rasija ciapier moža razhortvać balistyčny rakietny kompleks «Arešnik», ź listapada 2025 hoda źjavilisia abstalavanyja pazicyi dla srodkaŭ supraćpavietranaj abarony i radyjoelektronnaj baraćby. Heta zaŭvažyli žurnalisty-rasśledavalniki «Radyjo Svaboda», praanalizavaŭšy razam z vajskovym ekśpiertam apošnija spadarožnikavyja zdymki miesca.

Na spadarožnikavym zdymku servisu Planet Labs, zroblenym 17 lutaha 2026 hoda, u radyusie piaci kiłamietraŭ vakoł byłoha vajskovaha aeradroma «Radyjo Svaboda» naličyła nie mienš za šeść abstalavanych pazicyj z vajskovaj technikaj.

Častka hetaj techniki svajoj kanfihuracyjaj i cieniami, što jana adkidaje, nahadvaje rasijskija zienitna-rakietnyja kompleksy «Tor-M2» ci sučasny zienitny rakietna-harmatny kompleks «Pancyr», inšaja — kompleksy radyjoelektronnaj baraćby typu «Krasucha» ci «Maskva-1». Ale jakaść spadarožnikavaha zdymka nie dazvalaje vyznačyć typ techniki dakładna.

Usia pieraličanaja technika pryznačanaja dla abarony važnych abjektaŭ ad avijacyi, bieśpiłotnikaŭ i rakietnych udaraŭ. Ich zadača — vyjaŭleńnie pavietranych celaŭ, pry patrebie ich pierachop, a taksama zdušeńnie srodkaŭ navihacyi i kiravańnia praciŭnika.

Spadarožnikavy zdymak terytoryi kala byłoha vajskovaha aeradroma «Kryčaŭ-6» z šaściu łakacyjami abstalavanych pazicyj z vajskovaj technikaj vakoł jaho. U kruzie — vajskovy haradok ź imaviernym znachodžańniem vajskovych mašyn kompleksu «Arešnik». 17 lutaha 2026 hoda

Sa spadarožnikavych zdymkaŭ taksama vynikaje, što pieršaja technika dla supraćpavietranaj abarony pačała źjaŭlacca na pazicyjach u vakolicach aeradroma pad Kryčavam na pačatku listapada, kali zakładalisia pieršyja padmurki budynkaŭ vajskovaj bazy na ŭźlotna-pasadačnaj pałasie. U siaredzinie śniežnia — prykładna tady, kali Alaksandr Łukašenka zajaviŭ pra «zastupleńnie na bajavoje dziažurstva» ŭ Biełarusi rakietnaha kompleksu «Arešnik» — takich pazicyj vakoł aeradroma ŭžo było jak minimum šeść.

Na 17 lutaha 2026 hoda adna z abstalavanych pazicyj z vajskovaj technikaj znachodzicca kala vioski Zarubiec, dźvie — kala vioski Hannaŭka, adna — kala vioski Pałoškava, adna — kala vioski Krasnaja Buda, taksama abstalavanaja pazicyja ź niekalkimi mašynami, niekatoryja ź jakich mohuć być radyjołakacyjnymi stancyjami, na ŭskrajku vioski Novyja Damamieryčy. Vakoł niekatorych z hetych łakacyj vykapanyja nievialikija akopy, vakoł častki ź ich nasypanyja nievialikija abarončyja ziemlanyja vały.

Abstalavanaja pazicyja z vajskovaj technikaj, padobnaj da bajavoj mašynu zienitna-rakietnaha kompleksu «TOR-M2», kala vioski Pałoškava. Prykładna za try kiłamietry ad imaviernaj bazy raźmiaščeńnia «Arešniku». Spadarožnikavy zdymak 9 lutaha 2026 hoda

U centralnaj častcy vajskovaha haradka na terytoryi byłoha vajskovaha aeradroma na tym ža miescy, što zafiksavana na raniej praanalizavanych «Radyjo Svaboda» zdymkach ad 9 lutaha, znachodziacca 6 vialikich mašyn. Na dumku ekśpiertaŭ, jany mohuć naležać rakietnamu kompleksu «Arešnik». Ich pamier i praporcyi adpaviadajuć pamieram pakazanaj 30 śniežnia 2025 hoda ministerstvami abarony Rasii i Biełarusi techniki, jakaja tady nibyta «zastupiła na bajavoje dziažurstva». Vakoł hetaj techniki praciahvajuć uzvodzić anhar.

Na zdymkach taksama možna zaŭvažyć abjekt, jaki kanfihuracyjaj nahadvaje zienitna-rakietny kompleks S-300.

Spadarožnikavy zdymak vajskovaha haradka ŭ centralnaj častcy byłoha vajskovaha aeradroma «Kryčaŭ-6», na jakim bačnyja šeść mašyn, što mohuć naležać rakietnamu kompleksu «Arešnik», a taksama imavierny zienitna-rakietny kompleks S-300. 17 lutaha 2026 hoda

Jak adznačyŭ u kamientary «Radyjo Svaboda» ŭkrainski avijacyjny ekśpiert, namieśnik dyrektara kampanii — vytvorcy pryład dla radyjoelektronnaj baraćby Anatol Chrapčynski, z praanalizavanych im zdymkaŭ možna zrabić vysnovu, što kala aeradroma pad Kryčavam moža stvaracca šmatuzroŭnievaja sistema supraćpavietranaj abarony. I jana, na dumku ekśpierta, vyhladaje absalutna łahičnaj u vypadku raźmiaščeńnia ŭ hetym miescy kompleksu nakštałt «Arešnika».

«Kali Rasija raźmiaščaje mižkantynientalnuju balistyčnuju rakietu abo kompleks kštałtu «Arešnika», jana ŭ kožnym razie budzie budavać sistemu supraćpavietranaj abarony dla prykryćcia hetaha abjekta, bo jon maje dla jaje stratehičnaje značeńnie. I adpaviedna ešałanavanuju madel takoj abarony: sistemy vialikaj dalokaści, naprykład kłasa S-300, mohuć prykryvacca kompleksami bližejšaha dziejańnia nakštałt «Pancyra» abo «Tora». Heta ŭ pryncypie supadaje z tym, što my bačym z kanfihuracyi cieniaŭ ad techniki i jaje raźmiaščeńnia na spadarožnikavych zdymkach. Takim čynam pierakryvajucca «ślapyja zony» i zabiaśpiečvajecca kompleksnaja abarona abjekta».

Ekśpiert taksama adznačaje, što charaktar achovy, a taksama vialikaja kolkaść raznastajnaj techniki śviedčać pra vialikuju značnaść abjekta dla ŭładaŭ Rasii i Biełarusi:

«Havorka idzie pra zakryty vajskovy haradok z kałasalnym uzroŭniem abarony — jak naziemnaj, tak i pavietranaj. Taki ŭzrovień prykryćcia zvyčajna atrymlivajuć sapraŭdy važnyja abjekty».

Kamientary da artykuła