Źjaviłasia videa palotu bieśpiłotnika nad Homielem. Jon pralacieŭ praz centr horada ŭ bok Ukrainy
U internecie apublikavana videa, na jakim zafiksavany palot bujnoha bieśpiłotnika nad Homielem. Na kadrach, źniatych z samaha centra horada, dobra čutny charakterny huk ruchavika, jaki nahadvaje pracu matacykła.
Bieśpiłotnik u niebie nad centram Homiela. Skrynšot videa
Niahledziačy na industryjalny piejzaž na videa, zdymka sapraŭdy viałasia z samaha centra horada — z rajona płoščy Lenina, na jakoj znachodzicca budynak abłvykankama. Kamiera była skiravana na zachad, u bok ščylnaj žyłoj zabudovy, Centralnaha rynku i čyhunki.
Miarkujučy pa trajektoryi ruchu (sprava naleva), bieśpiłotnik pralacieŭ nad stratehična važnymi abjektami — homielskim čyhunačnym vuzłom i vakzałam — nakiroŭvajučysia na poŭdzień, u bok miažy z Ukrainaj.
Mierkavanaja trajektoryja palotu drona pavodle videa. Kałaž: Naša Niva
Raniej vydańnie «Fłahštok» paviedamlała pra mahčymaje źjaŭleńnie nad Homielem rasijskaha ŭdarnaha bieśpiłotnika Shahed-136 («Hierań»). Bajavaja častka takich aparataŭ moža ŭtrymlivać da 50 kiłahramaŭ vybuchoŭki.
Aficyjny telehram-kanał upraŭleńnia ideałohii Homielskaha abłvykankama adreahavaŭ na źjaŭleńnie videamateryjałaŭ pahrozami kryminalnaj adkaznaści za zdymki drona i publikacyju kadraŭ ź bieśpiłotnikami.