Viciebčuka zavabili 40 tysiačami dalaraŭ i naduryli na 75 tysiač rubloŭ

Jak paviedamlaje Śledčy kamitet, u listapadzie minułaha hoda 54‑hadovy žychar Viciebska ŭbačyŭ u tyktoku rekłamu pra mahčymaść chutkaha zarobku na inviestycyjach. Paddaŭšysia na jaje, jon ukłaŭ u spravu bujnuju sumu hrošaj, a ŭ vyniku zastaŭsia ni z čym.

Pierajšoŭšy pa spasyłcy, mužčyna atrymaŭ paviedamleńnie ad «asabistaha kuratara» ŭ Telegram. Toj sam stvaryŭ dla mužčyny pracoŭny kabiniet na płatformie i pravioŭ instruktaž, jak i kali ŭnosić hrošy.

Takim čynam mužčyna pieravioŭ na paznačany ŭ pierapiscy rachunak 150 rubloŭ i pačaŭ rabić ździełki pad kiraŭnictvam nastaŭnika.

U śniežni na jaho asabistaj staroncy adlustravałasia suma dachodu — 40 tysiač dalaraŭ ZŠA. Mužčyna zachacieŭ vyvieści hrošy, ale nie zmoh: kuratar pad roznymi arhumientami pastajanna prasiŭ papoŭnić rachunak — to nibyta hrošy pajšli nie tudy, to patrabavałasia dadatkovaja suma.

U vyniku mužčyna patraciŭ usie svaje srodki, uklučajučy hrošy, što źbiralisia na aŭtamabil, i ŭziaŭ kredyt u banku — ahulnaja suma nie mienš za 75 tysiač rubloŭ. Tolki tady jon vyrašyŭ pravieryć kampaniju ŭ internecie i vyśvietliŭ, što jaje daŭno nie isnuje.

Uśviadomiŭšy, što staŭ achviaraj ašukancaŭ, paciarpieły źviarnuŭsia da jurystaŭ, jakija nakiravali jaho ŭ milicyju.

Viciebskim haradskim adździełam Śledčaha kamiteta zaviedziena kryminalnaja sprava.

Kamientary da artykuła