Vyznačyłasia sietka płej-of chakiejnaha turniru na Alimpijadzie. Jon prachodzić pa chitraj sistemie
Na Zimovych Alimpijskich hulniach u Miłanie vyznačyłasia sietka płej-of mužčynskaha chakiejnaha turniru.
Zbornaja Kanady ličycca hałoŭnym favarytam. Na hrupavym turniry jana razhramiła Čechiju ź likam 5:0, pieramahła Šviejcaryju 5:1 i źniščyła Francyju 10:2. Gregory Shamus/Getty Images
Turnir, u jakim biaruć udzieł 12 zbornych, prachodzić pa chitraj sistemie. Spačatku hetyja 12 zbornych raźbivajucca na try hrupy pa čatyry kamandy ŭ kožnym i zvykła hulajuć u adno koła.
Ale potym nichto nie vybyvaje, a ŭsie zbornyja vystrojvajucca ŭ rejtynh ad 1 da 12. Pieršyja try miescy zajmajuć pieramožcy hrup, a taksama najlepšaja kamanda z druhich miescaŭ. Astatnija zbornyja ranžyrujucca z 4 pa 12‑ie miesca ŭ zaležnaści ad nabranych bałaŭ, hulniaŭ pamiž saboj i zakinutych šajb.
Takim čynam usie zbornyja praciahvajuć baraćbu.
Najlepšyja čatyry zbornyja (u našym vypadku heta Kanada, ZŠA, Słavakija (pieramahli ŭ hrupach) i Finlandyja (najlepšaja zbornaja z druhich miescaŭ) vyjšli adrazu ŭ 1/4 finału i majuć dva dni adpačynku.
A voś u 1/8 finału zaŭtra, 17 lutaha, zhulajuć pamiž saboj Šviejcaryja — Italija, Hiermanija — Francyja, Čechija — Danija, Šviecyja — Łatvija.
Ilustracyja: Biełaruski chakiej
U 1/4 finału 18 lutaha zhulajuć:
Kanada ź pieramožcam pary Čechija — Danija,
ZŠA — Šviecyja/Łatvija
Słavakija — Hiermanija/Francyja
Finlandyja — Šviejcaryja/Italija.
Paŭfinały projduć u piatnicu, matč za 3‑ie miesca ŭ subotu, finał — u niadzielu.
Upieršyniu za apošnija 12 hadoŭ u spabornictvach prymajuć udzieł hulcy NCHŁ.