Sturła Cholm Lehrejd vybačyŭsia pierad byłoj dziaŭčynaj za apovied pra zdradu

«Ja nie mahu heta vypravić, ale ciapier ja pakinu ŭsio heta zzadu, kab zasiarodzicca na Alimpijskich hulniach», — skazaŭ narviežac.

Sturła Cholm Lehrejd. Fota: AP Photo / Andrew Medichini

Alimpijski čempijon 2022 hoda ŭ estafiecie, siamirazovy čempijon śvietu, narviežski bijatłanist Sturła Cholm Lehrejd paprasiŭ prabačeńnia ŭ svajoj byłoj dziaŭčyny za zajavy pra zdradu paśla indyvidualnaj honki na 20 km na Alimpijskich hulniach — 2026 u Italii.

«Prynošu prabačeńni majoj byłoj dziaŭčynie, jakaja mižvoli apynułasia ŭ centry ŭvahi ŚMI. Spadziajusia, u jaje ŭsio dobra. Ja nie mahu heta vypravić, ale ciapier ja pakinu ŭsio heta, kab zasiarodzicca na Alimpijskich hulniach. Nie budu adkazvać na dalejšyja pytańni z hetaj nahody», — pryvodzić słovy Lehrejda VG.

U aŭtorak Sturła paśla bronzavaha finišu ŭ indyvidualnaj honcy publična pryznaŭsia ŭ zdradzie svajoj dziaŭčynie.

«Paŭhoda tamu ja sustreŭ kachańnie ŭsiaho svajho žyćcia — samuju pryhožuju i dobruju dziaŭčynu ŭ śviecie, a try miesiacy tamu ździejśniŭ samuju vialikuju pamyłku ŭ svaim žyćci — zdradziŭ joj.

Heta byŭ najhoršy tydzień u maim žyćci. Mahčyma, ciapier mnohija pahladziać na mianie inakš, ale ja dumaju tolki pra jaje. Ja nie zusim razumieju, pra što ciapier chaču skazać, ale sport u apošnija dni adyšoŭ na druhi płan. I škada, što ja nie mahu padzialicca ź joj hetym. Ja starajusia być dobrym prykładam dla pierajmańnia, ale zrabiŭ hłupstva.

Mnie niama čaho hublać. U mianie byŭ šaniec na sapraŭdnaje kachańnie, i ja ŭsio sapsavaŭ.

Nie abaviazkova daravać mnie. Ale kali jość choć niejki šaniec skazać joj, jak mocna ja jaje kachaju, navat kali heta miedyjna zabje mianie ŭ žyvym efiry, ja hatovy — aby atrymać hety drabniutki šaniec», — skazaŭ 28‑hadovy spartsmien paśla honki.

Siońnia na Alimpijadzie projdzie sprynt na 10 km u bijatłonie.

Kamientary da artykuła