Najlepšy futbalist Biełarusi, jaki vybiraŭ pamiž tureckim i karejskim kłubami, pierachodzić u viciebski «Maksłajn»

Stała viadoma, što 29‑hadovy paŭabaronca Valeryj Hramyka, jaki byŭ pryznany najlepšym futbalistam 2025 hoda i ŭ jakoha niadaŭna skončyŭsia kantrakt z kazachstanskim «Kajratam» z Ałmaty, praciahnie spartyŭnuju karjeru na radzimie.

Valeryj Hramyka

Hramyka padpisaŭ kantrakt z «Kajratam» u 2024 hodzie, staŭ u jaho składzie dvuchrazovym čempijonam Kazachstana i zhulaŭ razam sa svajoj kamandaj u hrupavym etapie Lihi čempijonaŭ. U ahulnym liku va ŭsich turnirach Hramyka zhulaŭ za hetu kamandu 57 matčaŭ, zabiŭ 7 hałoŭ i zrabiŭ 15 pieradač. 

Adnak zastavacca ŭ kamandzie paśla zakančeńnia kantrakta jon nie staŭ, a siońnia stała viadoma, što nastupny siezon jon praviadzie ŭ kłubie «MŁ-Viciebsk» — dziejnym čempijonie Biełarusi.

Raniej u Biełarusi Valeryj Hramyka hulaŭ za «Minsk», salihorski «Šachcior» i barysaŭski BATE. Taksama ŭ jaho bijahrafii byŭ siezon, praviedzieny ŭ rasijskim «Arsienale» z Tuły.

Pra jahony vierahodny sychod z «Kajrata» stała viadoma jašče niekalki miesiacaŭ tamu, ale viartańnie na radzimu stała dastatkova niečakanym. Raniej u jakaści mahčymaha novaha miesca pracaŭładkavańnia paŭabaroncy nazyvalisia paŭdniovakarejski «Sieuł», turecki «Hazijantep» i rasijski «Rubin» z Kazani.

Kamientary da artykuła