Vaśmikłaśnica ŭ rasijskim Krasnajarsku abliła bienzinam i padpaliła adnakłaśnika
Vaśmikłaśnica abliła bienzinam i padpaliła adnakłaśnika ŭ Krasnajarsku. U chłopca — apioki nie mienš za 30% cieła. Taksama jana źbiła małatkom jašče troch adnakłaśnikaŭ.
Pa danych Mash, usio zdaryłasia siońnia ŭ škole №153. 14‑hadovaja vučanica vośmaha kłasa praniesła ŭ navučalnuju ŭstanovu butelku ź bienzinam, — spačatku padpaliła ŭnitaz u prybiralni, paśla — adnahodka, užo ŭ kłasie.
Chłopca patušyli supracoŭniki škoły, u jaho apioki śpiny, tvaru i kaniečnaściaŭ 2‑3 stupieni. Adzieńnie zhareła całkam. Ciapier jaho žyćciu ničoha nie pahražaje — ź im pracujuć miedyki.
Taksama pry incydencie paciarpieli troje školnikaŭ.
Jak vyśvietliłasia paźniej, 14‑hadovaja dziaŭčynka spačatku padpaliła nakryŭku ŭnitaza ŭ prybiralni, zatym — zajšła ŭ kłas i pačała ablivać adnakłaśnikaŭ bienzinam. Niekalkich — začapiła małatkom, jakim razmachvała va ŭsie baki.
Vučniaŭ krasnajarskaj škoły №153 evakujavali na vulicu, dziaŭčynku aryštavali.