Čempijon Polščy pa boksie, što raptoŭna viarnuŭsia ŭ Biełaruś, patłumačyŭ niečakanaje viartańnie
Uładalnik tytuła mižnarodnaha čempijona Polščy pa boksie Jaŭhien Makarčuk, 32‑hadovy ŭradženiec Lidy, jaki jašče niadaŭna zajaŭlaŭ pra žadańnie vystupać pad polskim ściaham, niečakana viarnuŭsia ŭ Biełaruś.
Fota: Justyna Skubis / Dziewczyna z Kamera
U intervju Sport.tvp.pl jon patłumačyŭ viartańnie tym, što polskija mieniedžary jaho padmanvali:
«Ja źjechaŭ z Polščy, bo Viktar Materan i Dzianis Zvonik mianie padmanuli, i ja zrazumieŭ, što lepš nie mieć spravy z takimi ludźmi».
Jaŭhien kaža, što ŭ jaho jość dokaz, što jany padpisali kantrakt na boj u Šviejcaryi ŭ śniežni 2024 hoda bieź jaho viedama.
«Jany śćviardžali, što im terminova patrebny moj podpis. Jany taksama padmanuli mianie na 1500 jeŭra. Kazali, što hanarar za boj składaje 9000 jeŭra, ale ja źviazaŭsia z arhanizatarami viečara boksu, i jany dasłali mnie sapraŭdny kantrakt, u jakim była suma 10 500 jeŭra. Jany prosta skrali ŭ mianie 1500 jeŭra.
Paźniej ja razmaŭlaŭ z pramoŭtaram Maryjušam Hraboŭskim, prasiŭ jaho razabracca ŭ hetaj spravie, ale jon ničoha nie zrabiŭ. U mianie skłałasia ŭražańnie, što jon byŭ na ich baku», — kaža Jaŭhien.
«Prablema źjaviłasia ŭ śniežni 2024 hoda ŭ suviazi z bojem u Šviejcaryi, kali Zvonik padpisaŭ kantrakt za mianie. Materan ź nieviadomych pryčyn dasłaŭ jamu damovu, a toj jaje padpisaŭ. Nie ja! Ja nie chacieŭ tam baksavać, bo za miesiac da hetaha była hała Tymex, i ja chacieŭ vystupić tam. Ale tady mnie skazali, što ja nie mahu tam vystupać i pavinien jechać u Šviejcaryju», — kaža Jaŭhien.
Jon źbirajecca padać pazoŭ, bo ŭ jaho, zajaŭlaje baksior, jość usie dokazy taho, što «heta machlary i što jany padrablajuć podpisy. «U mianie taksama jość paviedamleńni, u jakich jany paklopničajuć na mianie bieź jakich-niebudź dokazaŭ», — kaža jon.
U jaho spytali, ci byli ŭ jaho jakija-niebudź prablemy ŭ Biełarusi pa viartańni.
— Byli pytańni, čamu ja baksavaŭ za Polšču. Ja baksavaŭ, tamu što ŭ mianie była polskaja licenzija, — adkazaŭ jon.
Na pytańnie, ci dapytvali jaho słužby paśla viartańnia, skazaŭ, što «razmova była», ale jon «ničoha nie zrabiŭ supraćzakonnaha».
— Čaho mnie bajacca? Ja spartoviec, nie palityk, — kaža jon.
Jon dadaje, što nikoli nie admovicca ad svajho biełaruskaha:
— Ja tut naradziŭsia, i heta moj dom!
Jaŭhien Makarčuk pierajechaŭ u Polšču vosieńniu 2022 hoda i nieŭzabavie staŭ vystupać na rynhu ŭ hetaj krainie. Jon vučyŭ polskuju movu, mieŭ namier atrymać hramadzianstva.
«U majoj siamji nas z pakaleńnia ŭ pakaleńnie vychoŭvali ŭ duchu polskaści. Dahetul my ź blizkimi padtrymlivajem polskija tradycyi i zvyčai. […] Mnie padabajecca ŭ Polščy, ja adčuvaju siabie tut jak doma. Ja palak. Maja mara — zavajavać pojas čempijona śvietu dla Polščy», — kazaŭ baksior u intervju jašče vosieńniu 2024 hoda.
Ciapier jon kaža nastupnaje: «Ja skazaŭ tady, što chaču zavajavać pojas dla Polščy, bo ŭ toj čas vystupaŭ prafiesijna pa polskaj licenzii. Mahu skazać adno: mnie tam było vielmi ciažka žyć. Mientalnaść, ludzi… usio zusim inšaje. Da taho ž ja navat drenna havaru pa-polsku, tamu mnie było ciažka. Ja prosta hnaŭsia za maraj stać čempijonam śvietu».
Viktar Materan, kamientujučy Sport.tvp.pl situacyju z Makarčukom, zajaviŭ, što abvinavačańni na jaho adras źjaŭlajucca niapraŭdaj i majuć na mecie apraŭdać rašeńnie vyjechać z Polščy ŭ Biełaruś, pryniataje značna raniej i ŭ zhodzie z trecimi asobami.
«Usie kantraktnyja i finansavyja pytańni vykonvalisia ŭ adpaviednaści z damoŭlenaściami i dziejučymi standartami. Ja nikoli nie padpisvaŭ i nie daručaŭ padpisvać jakija-niebudź dakumienty bieź viedama spartsmiena.
Pavodziny Jaŭhienija zadoŭha da adjezdu śviedčyli pra padrychtoŭku da razryvu damoŭlenaściaŭ i źmieny napramku karjery, što było viadoma ludziam sa spartyŭnaha asiarodździa. Ciapierašnija abvinavačańni ja razhladaju jak sprobu pierakłaści adkaznaść za ŭłasnyja rašeńni, kantekst i nastupstvy jakich vyklikajuć abhruntavanyja pytańni», — zajaviŭ Materan.