80% Charkava i vobłaści zastalisia biez elektryčnaści paśla rasijskaj ataki
Udar byŭ naniesieny bieśpiłotnikami, a taksama pry dapamozie reaktyŭnaj sistemy załpavaha ahniu «Tarnada-S».
Kiraŭnik Charkaŭskaj abłasnoj vajskovaj administracyi Aleh Siniahubaŭ paviedamiŭ, što ŭ vyniku kambinavanaha rasijskaha ŭdaru bolš za 80% rehijona, u tym liku abłasny centr, zastalisia biez elektraenierhii.
«Pad varožymi ŭdarami apynułasia našaja enierhietyka — jość davoli surjoznyja paškodžańni», — skazaŭ Siniahubaŭ.
Pavodle jaho słoŭ, udar byŭ naniesieny pry dapamozie reaktyŭnaj sistemy załpavaha ahniu «Tarnada-S», a taksama bieśpiłotnikaŭ.
«Razumiejem, što častka Charkava biez elektrazabieśpiačeńnia, pa vobłaści taksama prymienieny avaryjnyja hrafiki adklučeńniaŭ. Pakul pracujem praktyčna kruhłasutačna, kab likvidavać apieratyŭna nastupstvy i adnavić paškodžanuju enierhietyku», — adznačyŭ Siniahubaŭ.
Pavodle słoŭ mera horada Ihara Cierachava, hałoŭnaj metaj ataki była enierhietyčnaja infrastruktura. Paškodžańni jon acharaktaryzavaŭ jak vielmi ciažkija, što vyklikała adklučeńni śviatła praktyčna va ŭsich rajonach horada.
Adna z rakiet patrapiła ŭ rajon spartyŭnaj škoły pobač z žyłymi damami — paciarpieli 16 šmatkvaternych damoŭ (raźbityja dachi, vybityja vokny).
Akramia spartškoły, surjoznyja razbureńni atrymaŭ budynak jašče adnoj škoły. Siarod paciarpiełych — achoŭnik navučalnaj ustanovy.
Pad udaram apynulisia taksama biznes-abjekty i transpartnaja infrastruktura.
U apošnija tydni rasijskija vajskoŭcy nanosiać masavanyja ŭdary pa ŭkrainskich enierhietyčnych abjektach. Raniej najbolš mocnym abstrełam padviarhaŭsia Kijeŭ, dzie mnostva žyłych damoŭ zastavalisia biez elektryčnaści i aciapleńnia.
Zaraz tempieratura pavietra ŭ Charkavie apuściłasia da minus 13 hradusaŭ.