Avaryja na ciepłamahistrali ŭ Minsku — žychary piaci rajonaŭ mohuć zastacca z chałodnymi batarejami
Jak paviedamlajuć enierhietyki, praz paškodžańnie mahistralnaha trubapravoda ŭ damach minčukoŭ pačała padać tempieratura, a kamunalnyja słužby pierajšli na avaryjny režym pracy.
Prablemy z aciapleńniem zakranuli Frunzienski, Maskoŭski, Centralny, Saviecki i Kastryčnicki rajony.
U «Minskenierha» paćvierdzili fakt paškodžańnia ciepłamahistrali, adnak nie ŭdakładnili pryčyny zdareńnia. Na hety momant śpiecyjalisty sprabujuć adnavić tempieraturny i hidraŭličny režymy.
Jak paviedamiła vydańniu «Točka» čytačka ź mikrarajona Kamiennaja Horka, u jaje domie ŭžo źnikła aciapleńnie. A jašče niama haračaj vady.
«U čacie tavarystva ŭłaśnikaŭ žylla ŭžo lamant. Baćki z ranicy abmiarkoŭvali, ci varta adpraŭlać dziaciej u škołu», — kaža jana.
«Voś jak heta ŭsio nazvać: Minsk, ranica 19 studzienia, minus 17 marozu. Niama ni haračaj vady, ni aciapleńnia va ŭsim rajonie. Na CEC zdaryłasia avaryja. Takich marazoŭ doŭhi čas daŭno ŭžo nie było».
«Malinaŭka! Pračnułasia nočču z-za huku z batarej. Batarei pierastali pracavać. U kvatery choład».
«Frunzienski rajon i stancyja «Kuncaŭščyna» — batarei amal chałodnyja».
«U Sucharavie niama haračaj vady i aciapleńnia. Tuman na vulicy. Avaryja?»
«Malinaŭka siadzić biez aciapleńnia i haračaj vady. U 115 skazali, što spynieńnie abstalavańnia na CEC-4», — cytuje svaich čytačoŭ Onliner.
Z-za praryvu trubapravoda na ŭčastku vulicy Akademika Karskaha abmiežavany ruch transpartu pa vulicy Akademika Karskaha ad pierasiačeńnia z vulicaj Školnaj da pierasiačeńnia z vulicaj Maršała Łosika.
Enierhietyki zapeŭnivajuć, što viaduć adnaŭlenčyja raboty ŭ maksimalna mahčymym tempie.
Pa słovach načalnika adździeła enierhietyki ŭpraŭleńnia haradskoj haspadarki i enierhietyki Minharvykankama Andreja Sadoŭskaha, tempieratura ŭ ciepłasietkach budzie padniataja na praciahu niekalkich hadzin.
— U ciapierašni momant zrobleny pierachod na reziervovyja krynicy ciepłazabieśpiačeńnia i padymajecca tempieratura. Paškodžańnie łakalizavana, śpiecyjalisty raźbirajucca ŭ pryčynach adklučeńnia. Padvyšanaja nahruzka na ciepłapravod źviazana z vysokaj tempieraturaj ciepłanośbita i nizkimi tempieraturami vonkavaha pavietra, — paviedamiŭ jon.