U Biełarusi pačali rychtavacca da kłanavańnia chatnich žyvioł

U pačatku 2026 hoda ŭ Instytucie bijafiziki i kletačnaj inžynieryi NAN Biełarusi startavali daśledavańni ŭ halinie malekularnaj bijałohii i bijatechnałohii kletak, źviazanyja z temaj kłanavańnia, paviedamili ŭ Nacyjanalnaj akademii navuk.

Zdymak ilustracyjny. Fota: vecteezy.com

Prajekt realizujecca ŭ miežach dziaržaŭnaj navukovaj prahramy «Hienom, malekuła i kletka», tamu finansujecca ź biudžetu.

Navukovaja praca, pryśviečanaja atrymańniu plurypatentnych kletak i žanočych hamiet z donarskim jadrom, pavinna stać asnovaj dla stvareńnia ŭłasnaj biełaruskaj płatformy pa kłanavańni chatnich ulubioncaŭ.

Pry hetym navukoŭcy padkreślivajuć, što ich zacikaŭlenaść nie abmiažoŭvajecca tolki kamiercyjnymi metami. U pierśpiektyvie płanujecca zachavańnie redkich parod žyvioł, a taksama stvareńnie linij embryjanalnych stvałavych kletak, jakija možna budzie vykarystoŭvać u navukovych i dyjahnastyčnych daśledavańniach.

Kali mienavita ŭ Biełarusi źjavicca pasłuha kłanavańnia chatnich žyvioł, u instytucie pakul nie paviedamlajuć. Jaje košt taksama nie nazyvajecca. Adnak viadoma, što ŭ inšych krainach takija pasłuhi ŭžo dastupnyja i kaštujuć vielmi doraha.

Naprykład, u Rasii minimalnaja cana kłanavańnia chatniaj žyvioliny składaje kala 4 miljonaŭ rasijskich rubloŭ (kala 52 tysiač dalaraŭ)— z ulikam zboru bijamateryjału i dastaŭki žyvioły ŭładalnikam. Suśvietnyja lidary rynku — amierykanskaja kampanija ViaGen Pets i kitajskaja Sinogene — prosiać prykładna 50 tysiač dalaraŭ za kłanavańnie sabaki, ad 30 da 50 tysiač — za kata i kala 85 tysiač dalaraŭ — za kania.

Rynak kłanavańnia žyvioł chutka raźvivajecca, tamu nie vyklučana, što da momantu zapusku biełaruskaj płatformy ceny stanuć nižejšymi, chacia harantyj hetaha pakul niama.

Kamientary da artykuła