Za nastupnuju piacihodku ŭ Biełarusi płanujuć abnavić čyhunačny transpart i račny fłot

U Biełarusi padrychtavali dziaržaŭnuju prahramu raźvićcia transpartnaj infrastruktury na 2026—2030 hady. Jaje pradstaviła Ministerstva transpartu i kamunikacyj. Prahrama praduhledžvaje maštabnaje abnaŭleńnie ŭsich vidaŭ transpartu i realizacyju važnych infrastrukturnych prajektaŭ.

Zdymak ilustracyjny. Fota: «Naša Niva»

Na praciahu najbližejšych piaci hadoŭ na hetyja mety płanujecca nakiravać kala 8 miljardaŭ rubloŭ.

Prahrama ŭklučaje čatyry padprahramy — čyhunačnuju, aŭtamabilnuju i haradskoha pasažyrskaha transpartu, vodnuju i pavietranuju. Asnoŭnyja zadačy — abnaŭleńnie ruchomaha sastavu, palapšeńnie jakaści i dastupnaści transpartnych pasłuh, raźvićcio infrastruktury, a taksama pavyšeńnie efiektyŭnaści pracy račnoha i avijacyjnaha transpartu.

Ułady źbirajucca nabyć kala 3,5 tysiač adzinak aŭtamabilnaha i haradskoha pasažyrskaha transpartu, abnavić čyhunačny i avijapark, a taksama madernizavać račny fłot. Usiaho zapłanavana 27 mierapryjemstvaŭ, ź jakich 19 — infrastrukturnyja prajekty.

Siarod klučavych inicyjatyŭ — arhanizacyja chutkasnaha čyhunačnaha złučeńnia z Nacyjanalnym aeraportam Minsk, budaŭnictva treciaj linii Minskaha mietro, uźviadzieńnie tramvajnaj linii ŭ Navapołacku i rekanstrukcyja tramvajnych šlachoŭ u Viciebsku. Taksama praciahniecca madernizacyja hidravuzłoŭ na Dniaproŭska-Buhskim kanale ŭ Bresckaj vobłaści.

Za papiaredniuju piacihodku (2021—2025), jak adznačajecca, było pieravieziena 8,2 miljarda pasažyraŭ, abnoŭlena bolš za 2,5 tysiačy adzinak transpartu. U tym liku nabyli try šyrokafiuzielažnyja samaloty Airbus A330, elektraciahniki, ciepłavozy, tysiačy hruzavych vahonaŭ, adkryli novyja stancyi mietro i adramantavali hidravuzły.

Na novuju piacihodku pastaŭlena jašče bolš ambicyjnaja meta — pieravieźci 9,3 miljarda pasažyraŭ. 

Kamientary da artykuła