Tramp zajaviŭ pra pierasiačeńnie Iranam čyrvonaj linii
Donald Tramp zajaviŭ, što Iran zaprasiŭ pieramovy z ZŠA na fonie žorstkaha padaŭleńnia pratestaŭ. Ale, dadaje Tramp, mahčyma, ZŠA pavinny buduć umiašacca raniej.
Donald Tramp. Fota: AP Photo / Julia Demaree Nikhinson
Iran, vidać, pierasiakaje čyrvonuju liniju, žorstka padaŭlajučy pratesty, zajaviŭ prezident ZŠA Donald Tramp žurnalistam na borcie Air Force One. Jaho słovy apublikavaŭ puł Biełaha doma.
«Jany pačali, padobna, [pierasiakać čyrvonuju liniju]. Zdajecca, byli zabityja ludzi, jakich nie varta było zabivać. Jany žorstkija [u kiraŭnictvie Irana] — možacie nazyvać ich lidarami, ja nie viedaju, ci možna ich nazvać lidarami. Dumaju, jany kirujuć z dapamohaj hvałtu. Ale my vielmi surjozna da hetaha stavimsia, vajskoŭcy taksama. I jość niekalki varyjantaŭ», — skazaŭ Tramp.
Pavodle jaho słoŭ, iranskaje kiraŭnictva zaprasiła pieramovy z ZŠA.
«Mahčyma, nam pryjdziecca dziejničać da sustrečy. <…> Sustreča znachodzicca na stadyi arhanizacyi. Iran patelefanavaŭ. Jany chočuć vieści pieramovy», — kaža jon.
Pa infarmacyi Axios, amierykanskaja pravaabarončaja arhanizacyja HRANA paćvierdziła śmierć bolš za 544 čałaviek za apošnija dva tydni i aryšt bolš za 10 tys. čałaviek padčas pratestaŭ pa ŭsim Iranie.
Axios piša, što ŭnutry amierykanskaj administracyi prajšli pieršyja sustrečy dla abmierkavańnia sposabaŭ padtrymki pratestaŭ. Siarod varyjantaŭ — «vajennyja ŭdary ZŠA pa celach iranskaha režymu», a taksama kibierataki i infarmacyjnyja apieracyi suprać Tehierana.
Iranskija čynoŭniki ŭ adkaz paabiacali, što Tehieran budzie atakavać vajennyja bazy ZŠA ŭ rehijonie, kali Tramp addaść zahad ab napadzie.