U Biełarusi źbirajucca ŭvieści ličbavyja pašparty

Dziaržaŭnaja prahrama «Ličbavaja Biełaruś» na 2026—2030 hady praduhledžvaje skaračeńnie papiarovych dakumientaŭ za košt vykarystańnia ich ličbavych viersij pry vyrašeńni roznych žyćciovych i dziełavych pytańniaŭ. Adpaviednaja pastanova Savieta Ministraŭ №793 ad 30 śniežnia apublikavanaja na Nacyjanalnym pravavym internet-partale.

Zdymak ilustracyjny

Zhodna z dakumientam, u najbližejšuju piacihodku płanujecca raspracavać i pačać vykarystoŭvać ličbavyja vobrazy šerahu dakumientaŭ, u tym liku pašparta hramadzianina.

Akramia jaho, u elektronny vyhlad mohuć pieravieści:

• paśviedčańnie kiroŭcy;
• strachavoje paśviedčańnie dziaržaŭnaha sacyjalnaha strachavańnia;
• źviestki ź indyvidualnaha asabovaha rachunku;
• dazvoł na časovaje pražyvańnie;
• paśviedčańnie ab rehistracyi transpartnaha srodku;
• vajskovy bilet;
• piensijnaje paśviedčańnie;
• dakumienty ab naradžeńni, šlubie, razvodzie, ustanaŭleńni baćkoŭstva ci źmienie imia;
• paśviedčańnie invalida;
• dakumienty na nieruchomuju majomaść;
• zaklučeńnie miedyka-reabilitacyjnaj ekśpiertnaj kamisii;
• paśviedčańnie na prava kiravańnia małamiernym sudnam.

Kančatkovy śpis takich dakumientaŭ vyznačać dziaržaŭnyja orhany. U 2026 hodzie prahramu płanujuć dapoŭnić mierami pa stvareńni abo madernizacyi infarmacyjnych sistem, nieabchodnych dla farmiravańnia ličbavych dakumientaŭ.

U vyniku hramadzianie pavinny atrymać mahčymaść atrymlivać i vykarystoŭvać infarmacyju pra siabie praz mabilnyja i veb-dadatki, kab chutka vyrašać žyćciovyja i dziełavyja pytańni ŭ elektronnaj formie.

Akramia taho, urad płanuje zabiaśpiečyć pracu z ID-kartaj praz mabilnyja pryłady — dla identyfikacyi, aŭtentyfikacyi i stvareńnia elektronnaha ličbavaha podpisu, a taksama ŭkaranieńnie identyfikacyi z vykarystańniem bijamietryčnych danych i ŭnikalnaha identyfikatara karystalnika.

Kamientary da artykuła