Chakierka z dapamohaj štučnaha intelektu publična źniščyła «Tinder dla nieanacystaŭ»
Na chakierskaj kanfierencyi Chaos Communication Congress aktyvistka pad psieŭdanimam Martha Root praviała demanstratyŭnuju ataku na ŭltrapravy servis znajomstvaŭ WhiteDate.
Padčas dakłada «The Heartbreak Machine: Nazis in the Echo Chamber» Rut, jakaja vystupała ŭ kaściumie Ružovaha rejndžara, zapuściła na scenie Python-skrypt i ŭ realnym časie vydaliła bazy źviestak i reziervovyja kopii sajtaŭ. Kožnaja kamanda — ad vydaleńnia damienaŭ da bekapaŭ — supravadžałasia vopleskami zały, paviedamlaje vydańnie dev.by.
Asablivaść ataki ŭ tym, što pierad źniščeńniem płatformy Rut razharnuła čat-bota na bazie adkrytaj madeli Llama ad Meta.
Bot byŭ śpiecyjalna navučany vieści razmovy ŭ duchu tradycyjanalizmu i ŭltrapravych kaštoŭnaściaŭ, kab vyklikać davier karystalnikaŭ i sabrać jak maha bolš infarmacyi da taho, jak administracyja zaŭvažyć uzłom.
U padkazcy dla madeli ŭkazvałasia demanstravać cikavaść da «tradycyjnych siamiejnych rolaŭ i spadčyny», kamunikavać pryjazna i paźbiahać pieradačy kantaktnych źviestak da asabistaj sustrečy.
Sa słoŭ Rut, biaśpieka WhiteDate była «horšaj nie byvaje»: poŭny śpis karystalnikaŭ možna było ściahnuć, prosta adkryŭšy śpiecyjalny URL. U vyniku joj udałosia atrymać źviestki bolš jak 6 500 akaŭntaŭ, kala 86% ź jakich naležali mužčynam.