Mačada prapanavała padzialić svaju Nobieleŭskuju premiju miru z Trampam
Lidarka vieniesuelskaj apazicyi Maryja Karyna Mačada zajaviła, što chacieła b padzialić svaju Nobieleŭskuju premiju miru z prezidentam ZŠA Donaldam Trampam. Jana adznačyła, što źviaržeńnie Nikałasa Madura stała važnym krokam dla ŭsiaho čałaviectva, svabody i pavahi da čałaviečaj hodnaści.
Maryja Karyna Mačada padčas pratesnaha mitynhu ŭ Karakasie, studzień 2025 hoda. Fota: Ariana Cubillos / AP
U intervju Fox News Mačada padkreśliła, što dziejańni ZŠA, u tym liku vajennaje ŭmiašańnie, adyhrali vyrašalnuju rolu ŭ adchileńni Madura ad ułady. Pavodle jaje słoŭ, premija naležyć usiamu vieniesuelskamu narodu, a jana chacieła b asabista padziakavać Trampu i padzialić ź im hetu ŭznaharodu.
Mačada atrymała Nobieleŭskuju premiju miru 2025 hoda za samuju značnuju za apošnija hady mirnuju sprobu supraćstajać režymu Madura. Jana pryznałasia, što nie mieła znosin z Trampam z momantu abviaščeńnia vynikaŭ premii, choć jon paźniej i pavinšavaŭ jaje. Pry hetym amierykanskija ŚMI paviedamlali, što Tramp byŭ niezadavoleny tym, što Mačada nie admoviłasia ad premii na jaho karyść.
Vieniesuelskaja apazicyjanierka taksama paviedamiła, što płanuje jak maha chutčej viarnucca ŭ Vieniesuełu. Raniej jana doŭhi čas chavałasia paśla zatrymańnia na antyŭradavym prateście ŭ Karakasie.
Niahledziačy na pierakanaŭčuju pieramohu Mačada na ŭnutrypartyjnych vybarach apazicyi, joj zabaranili zajmać dziaržaŭnyja pasady, tamu na prezidenckich vybarach zamiest jaje bałatavaŭsia Edmunda Hansales. Pavodle niezaležnych padlikaŭ, jon vyjhraŭ vybary, adnak uładami pieramožcam byŭ abvieščany Madura, što mnohija paličyli falsifikacyjaj.
Tym časam u Vieniesuele časovaj vykonaŭcaj abaviazkaŭ prezidenta stała vice-prezidentka pry Madura Dełsi Radryhies. Jana zajaviła pra hatoŭnaść supracoŭničać z administracyjaj Trampa. U toj ža dzień Madura paŭstaŭ pierad sudom u Ńju-Jorku, dzie jamu vystavili abvinavačańni, u tym liku ŭ narkateraryźmie i zmovie z metaj pastavak kakainu ŭ ZŠA.
Čytajcie taksama:
Tramp pra Mačada: U jaje niama padtrymki ŭnutry krainy, choć jana vielmi miłaja žančyna
Nobieleŭskaja łaŭreatka Maryja Karyna Mačada: My hatovyja ŭziać uładu ŭ Vieniesuele
Nobieleŭskaja łaŭreatka Mačada zmahła tajna dabracca da Osła paśla niekalkich hadoŭ padpolla
Łaŭreat Nobieleŭskaj premii miru Maryja Karyna Mačada pachvaliła Bińjamina Nietańjachu
Vieniesuelskaja łaŭreatka Nobieleŭskaj premii miru pryśviaciła jaje svajmu narodu i Donaldu Trampu