U histaryčnym centry Mahilova pastavili skulpturu paŭhołaha armreślera
Na piešachodnaj vulicy Leninskaj u Mahilovie źjaviŭsia novy art-abjekt — skulptura atleta-armreślera. Muskulisty mužčyna ŭ adnych trusach raźmiaściŭsia pobač z histaryčnym pravasłaŭnym asiarodkam.
Skulptura armreślera na piešachodnaj Leninskaj vulicy ŭ Mahilovie. Fota: magilev.by
Skulpturu ŭstanavili pierad samym Novym 2026 hodam u ramkach praciahu rabot pa dobraŭparadkavańni histaryčnaha centra. Pavodle zadumy, bronzavy atlet abapirajecca łokciem na nievialiki stolik, niby zaprašajučy minakoŭ pazmahacca ź im na rukach.
Ci simvalizuje hety vobraz niejkuju kankretnuju asobu ci padzieju, nie tłumačycca. Vybar takoha piersanaža dla histaryčnaha jadra horada vyhladaje davoli dziŭna.
Skulptura armreślera na piešachodnaj Leninskaj vulicy ŭ Mahilovie. Fota: magilev.by
Skulptura armreślera na piešachodnaj Leninskaj vulicy ŭ Mahilovie. Na miescy budynkaŭ za śpinaj skulptury da vajny raźmiaščaŭsia kompleks handlovych radoŭ i pravasłaŭnaha Spaskaha manastyra. Fota: magilev.by
Skulptura znachodzicca ŭ niepasrednaj blizkaści ad archirejskaha padvorja i terytoryi byłoha Spaskaha manastyra. Ciapier tut mieściacca Mahiloŭskaja jeparchija Biełaruskaj pravasłaŭnaj carkvy i Duchoŭna-aśvietnicki centr imia śviaciciela Hieorhija Kaniskaha. Čamu mienavita pobač z duchoŭnymi abjektami źjaviŭsia armreśler, zastajecca zahadkaj.
Varta adznačyć, što na hetym učastku vulicy Leninskaj, ad płoščy Słavy da vulicy Bołdzina, užo ŭstalavana niekalki art-abjektaŭ, adnak bolšaść ź ich na muzyčnuju tematyku, bo znachodziacca pobač z budynkam muzyčnaj škoły. Novaja skulptura vidavočna vybivajecca z hetaha šeraha.