Rasijanie rasstralali ŭ Pakroŭsku siemiarych miascovych žycharoŭ, jakija nie evakujavalisia i chavalisia ŭ padvale
U Pakroŭsku dvoje rasijskich vajskoŭcaŭ rasstralali siem čałaviek, siarod jakich cełaja siamja. Pryčynaj raspravy stała toje, što sałdaty patrabavali ałkahol, a jaho nie było.
Fota: Russian Defense Ministry Press Service via AP
Pavodle źviestak, jakija stali viadomyja ŭkrainskamu prajektu «Chaču žyć» z krynic u rasijskim vojsku, trahiedyja adbyłasia ŭ noč na 21 śniežnia ŭ domie № 84 na vulicy Centralnaj.
Dva bajcy 30‑j motastrałkovaj bryhady — Rynat Halimzianaŭ (uradženiec Baškartastana, 1996 h. n.) i raniej sudzimy Alaksiej Ahafonaŭ (z Buracii,1987 h. n.) — uvarvalisia ŭ padvał, dzie ludzi chavalisia ad vajny.
Da sałdat vyjšli Alaksandr Zavadski i jaho syn Jarasłaŭ. Kali na patrabavańnie dać śpirtnoje mužčyny adkazali, što ałkaholu niama, rasijanie adkryli ahoń i zabili baćku i syna na miescy.
Paśla hetaha zabojcy spuścilisia ŭhłyb padvała i rasstralali tam usiu siamju: baćku Dźmitryja Hulko, maci Aksanu Hulko, ich syna Dźmitryja Hulko i maci Aksany — Nadzieju. Taksama byŭ zabity mužčyna pa imieni Alaksandr.
Jašče adzin čałaviek, Piotr Miaroncaŭ, atrymaŭ ranieńnie, ale prykinuŭsia miortvym i paźniej zmoh uciačy.
Kab schavać ślady złačynstva, sałdaty padpalili dom i dałažyli svajmu kamandziru z pazyŭnym «Vudu», što nibyta źniščyli «ŭkrainskuju DRH».
Zabojcaŭ zatrymali 23 śniežnia dziakujučy śviedčańniam Miaroncava.
Raniej paviedamlałasia pra jašče adno źvierstva bajcoŭ hetaj ža bryhady: 22 śniežnia jany zhvałtavali miascovuju žycharku Viktoryju Švajko, a jaje muža zakatavali i zabili. Sužency čakali «vyzvaleńnia» ad Ukrainy.