Žychar Babrujska ŭ pryvatnaj pierapiscy z byłoj žonkaj abraziŭ jaje. Jaho aštrafavali
Kanflikt pamiž byłymi sužencami z-za alimientaŭ i starych daŭhoŭ skončyŭsia dla žychara Babrujska sudovaj pastanovaj i štrafam. Mužčyna nie strymaŭ emocyj padčas pierapiski, a žančyna pajšła ŭ milicyju.
Sprečka razharełasia ŭ miesiendžary, dzie baki sprabavali vyrašyć finansavyja pytańni. U pierapiscy babrujčanin vykarystaŭ słova, jakoje prynižała honar i hodnaść jaho byłoj žonki. Žančyna vyrašyła nie pakidać heta biez uvahi i napisała zajavu ŭ pravaachoŭnyja orhany.
Dla acenki paviedamleńnia była pryznačana linhvistyčnaja ekśpiertyza.
Sudovy ekśpiert paćvierdziŭ, što tekst utrymlivaje niehatyŭnuju acenku asoby ŭ nienarmatyŭnaj formie. Sud pryznaŭ mužčynu vinavatym u abrazie i pryznačyŭ jamu pakarańnie ŭ vyhladzie štrafu. Suma nie nazyvajecca.