U Minsku pačaŭ pracavać pieršy navahodni kirmaš
Uviečary 18 śniežnia stryt-fud-placoŭka «Piasočnica» adkryła zimovy siezon. Technična heta nie zusim kirmaš. Choć… Pačastunki jość, hulni jość, jołka — taksama majecca. Tamu atmaśfiera całkam adpaviadaje kłasičnym navahodnim łakacyjam, piša Onliner.by.
Placoŭka budzie pracavać 11 dzion — da 28 śniežnia ŭklučna. Na kožny dzień užo zapłanavanaja nasyčanaja prahrama: kancerty na vialikim ekranie, teatralnyja imprezy, animacyja ad kazačnych hierojaŭ.
Darečy, klučavym piersanažam placoŭki ŭ zimovym siezonie stanie Pasiečnik. Kožny dzień roŭna ŭ 18:50 jon razam z haściami budzie zapalvać ahni na jołcy.
Pa vychodnych zabaŭ jašče bolš. Naprykład, u niadzielu, 21 śniežnia, dziaciej čakaje šou mylnych burbałak ad Śniežnaj karalevy i sustreča z elfami.
Taksama na placoŭcy budzie pracavać płanietaryj — štodnia z 18:00 da 21:00. Kožny sieans praciahłaściu 9 chvilin. Zapisacca na jaho možna zahadzia — u haściej z rehistracyjaj budzie mahčymaść prajści biez čarhi. Dla ŭsich astatnich haściej — pry najaŭnaści volnych miescaŭ.
«Heta budzie nievialikaje padarožža, dzie na niekalki chvilin možna adciahnucca ad mituśni, zapavolicca i prosta pahladzieć uharu», — abiacajuć arhanizatary.
I, viadoma, nie abydziecca bieź ježy. Tut buduć pracavać 10 łakacyj ź ježaj: Trdlo House; BELIHIN.BY; Grill Factory; Gem.kebab Ø18; Elfaranoche; Salty Dog; TESTO; THAI POINT; Bubble Bee Tea; Waffles On Wheels. Kožny fudtrak pradstavić svoj śviatočny siet pa adzinaj canie — 15 rubloŭ.
A jašče na terytoryi pastavali cir i fotabudku ź imhniennym drukam fatahrafij. Uvachod na placoŭku svabodny.
Inšyja zimovyja kirmašy pačnuć pracu ŭ Minsku ŭžo ŭ hetuju subotu. Tak, 20 śniežnia adkryjecca tradycyjnaja placoŭka kala Pałaca sportu, ź zimovaj prahramaj vierniecca «Lepšaja vulica» — jana budzie pracavać da 11 studzienia, taksama pačnie dziejničać kirmaš u Lakeside Park. Łakalnaja kaladnaja placoŭka ŭ «Novaj Baravoj» startuje krychu paźniej — 24 śniežnia — i budzie pracavać dva tydni.