Dena Dryskała, jaki tolki niadaŭna staŭ zajmacca Ukrainaj ad ZŠA, užo adchilili ad pieramoŭnaha pracesu

Pavodle źviestak vydańnia The Telegraph, kiraŭnik Pientahona Pit Chiehsiet adchiliŭ ministra Suchaputnych vojskaŭ ZŠA Dena Dryskała ad udziełu ŭ mirnych pieramovach pa Ukrainie. Pryčynaj stała toje, što Dryskał nibyta pieravysiŭ svaje paŭnamoctvy i zanadta aktyŭna ŭmiešvaŭsia ŭ praces. 

Fota: Photo by Cheriss May / Getty Images

Den Dryskał mieŭ dobruju reputacyju ŭ administracyi Donalda Trampa i karystaŭsia papularnaściu siarod jeŭrapiejskich dypłamataŭ dziakujučy svajmu vopytu i ŭzvažanaści. Tamu jon atrymaŭ važnuju rolu ŭ pieramovach i ŭ listapadzie pradstaviŭ Uładzimiru Zialenskamu 28‑punktavy mirny płan, na jaki raźličvaŭ Tramp. Tady ž jon staŭ najvyšejšym pradstaŭnikom administracyi, jaki naviedaŭ Ukrainu.

Padčas vizitu Dryskału daručali damahčysia padtrymki hetaha płana z boku Kijeva. Niekatoryja jeŭrapiejskija ŭdzielniki pieramoŭ adznačali, što jon nie asabliva imknuŭsia da kampramisaŭ na karyść ukrainskaj pazicyi.

Miarkujecca, što jaho styl viadzieńnia pieramoŭ pryciahnuŭ uvahu Trampa, jaki viadomy jak žorstki pieramoŭca. Adnak dva tydni tamu Dryskał niečakana skasavaŭ čarhovuju pajezdku ŭ Kijeŭ, a taksama nie pajechaŭ u Paryž 1 śniežnia, choć vizit byŭ abiacany. Ukrainski bok byŭ ździŭleny i miarkuje, što jamu prosta nie dazvolili prybyć.

Pavodle krynic The Telegraph, jaho źniknieńnie ź pieramoŭnaha pracesu — častka bolš šyrokaj baraćby za kantrol nad mirnymi pieramovami ŭnutry administracyi Trampa. Dryskał naležaŭ da hrupy, źviazanaj ź vice-prezidentam Džej Dzi Vensam. Inšaja hrupa, pad kiraŭnictvam Marka Rubia, ciapier uzmacniaje svoj upłyŭ i budzie ŭdzielničać u sustrečy ŭ Paryžy. Treciaja hrupa, u skład jakoj uvachodziać Styŭ Uitkaf i Džared Kušnier, taksama nabiraje vahu.

Surazmoŭcy adznačajuć, što nastroj pieramoŭ časta źmianiajecca ŭ zaležnaści ad taho, jakaja z hetych hrup biare na siabie bolšy kantrol.

Kamientary da artykuła