Donar z ankahiennaj mutacyjaj staŭ baćkam amal 200 dziaciej u Jeŭropie — niekatoryja ŭžo pamierli ad raku
Donar śpiermy, jaki pačaŭ zdavać śpiermu ŭ Danii ŭ 2005 hodzie, staŭ bijałahičnym baćkam jak minimum 197 dziaciej u 14 krainach Jeŭropy, vyjaviła maštabnaje žurnalisckaje rasśledavańnie, praviedzienaje 14 jeŭrapiejskimi miedyjakampanijami.
Fota: Getty Images
Jeŭrapiejski bank śpiermy ŭ Danii, jaki pradaŭ śpiermu, zajaviŭ, što vykazvaje paciarpiełym siemjam «hłybokaje spačuvańnie».
U hetaha donara vyjaŭlena mutacyja ŭ hienie TP53, jakaja značna pavyšaje ryzyku raźvićcia raku. Dzieci, narodžanyja ad śpiermatazoidaŭ z mutacyjaj, atrymlivajuć sindrom Li-Fraŭmieni, jaki daje da 90% ryzyki ankałahičnaha zachvorvańnia na praciahu žyćcia, čaściej za ŭsio ŭ malenstvie.
Sam donar zastajecca zdarovym, bo niebiaśpiečnaja mutacyja prysutničaje nie va ŭsim jahonym arhaniźmie, a tolki prykładna ŭ 20% jaho śpiermatazoidaŭ. Adnak dziesiaci dzieciam, narodžanym ad hetaha donara, užo pastaŭleny dyjahnaz «rak», i niekatoryja ź ich pamierli ŭ vielmi rańnim uzroście.
Jeŭrapiejski bank śpiermy ŭ Danii zajaviŭ, što mutacyja takoha rodu nie vyjaŭlajecca standartnymi skryninhami, i donar byŭ nieadkładna zabłakavany, jak tolki prablema vyśvietliłasia.
Za 17 hadoŭ jaho śpiermu vykarystali 67 klinik.
U chodzie rasśledavańnia taksama vyjaviłasia, što ŭ niekatorych krainach byli parušanyja nacyjanalnyja normy kolkaści dziaciej ad adnaho donara. Naprykład, u Bielhii, dzie limit składaje šeść siemjaŭ, hety donar staŭ baćkam 53 dziaciej u 38 žančyn. Ekśpierty adznačajuć, što mižnarodnaha zakona, jaki b rehulavaŭ kolkaść naščadkaŭ ad adnaho donara, nie isnuje.