Dyrektarka miasakambinata raskazała, jak treba pravilna narazać kaŭbasu

Dla taho kab całkam raskryć smak syravendžanaj kaŭbasy, akazvajecca, treba jaje pravilna narazać. Dyrektarka małdaŭskaha miasakambinata Mezellini Anžeła Hiearhica za ličanyja chviliny raskazała, jak heta pravilna zrabić i za što mienavita prafiesijnym kartadoram hatovyja płacić pa 100 dalaraŭ za hadzinu pracy, piša Telegraf.news.

Skrynšot ź videa

Pa słovach Anžeły Hiearhicy, smak syravendžanaj kaŭbasy, jak i luboha inšaha miasnoha praduktu, zaležyć nie tolki ad receptu. Abrany nabor śpiecyj i vostrych prypraŭ, ich pravilnaje spałučeńnie i dastatkovaja kolkaści soli, biezumoŭna, niepasredna ŭpłyvajuć na smakavyja jakaści. Ale navat idealny bukiet vodaraŭ i smakaŭ moža sapsavać niapravilnaja narezka, śćviardžaje śpiecyjalistka.

Mienavita tamu, pa słovach dyrektarki miasakambinata, prafiesijnym kartadoram (śpiecyjalistam pa narezcy miasnych dalikatesaŭ, u pryvatnaści ispanskaha chamona) hatovyja płacić vialikija hrošy za pravilnuju narezku, jakaja daść praduktu całkam raskrycca.

«Prafiesijanały biaruć za hetuju pracu pa 100 dalaraŭ za hadzinu. Hetamu vučacca, atrymlivajuć dypłomy. Paviercie, kartadory robiać svaju pracu nie dla šou, a dla smaku», — patłumačyła Hiearhica.

Jana nazvała dva hałoŭnyja praviły narezki kaŭbasy, jakija možna ŭziać na ŭzbrajeńnie i aprabavać na nastupnyja śviaty.

Pa-pieršaje, narazać kaŭbasu śpiecyjalistka paraiła pad vuhłom, kab atrymać bolšuju łustačku, jakaja budzie całkam pakryvać jazyk.

Dla hetaha treba vykarystoŭvać usie smakavyja receptary adnačasova. Jak viadoma, jany raźmierkavanyja na jazyku čałavieka pa zonach: receptary, jakija adkazvajuć za sałodki smak, znachodziacca na končyku jazyka, za kisłaje i salonaje — pa bakach, za vostraje — zzadu. Kali zadziejničać usie receptary adnačasova, smak budzie bolš jarkim i nasyčanym.

Pa-druhoje, kaŭbasu Anžeła Hiearhica paraiła narazać maksimalna tonkimi łustačkami.

Čym taŭściejšyja kavałački, tym daŭžej ich pryjdziecca razžoŭvać, častka miasa i śpiecyj moža zasiadać u zubach, a smak budzie raskryvacca bolš pavolna i nieraŭnamierna.

Kamientary da artykuła