Vyznačyli novy paradak vykarystańnia navihacyjnych płombaŭ dla zamiežnych hruzavikoŭ

Urad Biełarusi ŭstanaviŭ novyja praviły vykarystańnia navihacyjnych płombaŭ — elektronnych pryład, jakija dazvalajuć u realnym časie adsočvać ruch hruzavoha transpartu i fiksavać uskryćcio hruzavych adsiekaŭ. Adpaviedny dakumient 3 śniežnia apublikavali na Nacyjanalnym pravavym internet-partale.

Zdymak ilustracyjny. Fota: «Naša Niva»

Navihacyjnyja płomby ciapier možna vykarystoŭvać zamiest mytnaha supravadžeńnia abo jak srodak identyfikacyi, ale ŭ šerahu vypadkaŭ ich vykarystańnie stanovicca abaviazkovym.

Pavodle novych pravił, zamiežnyja hruzaviki, jakija ŭjazdžajuć u Biełaruś ź Litvy, Łatvii i Polščy, a taksama pustyja fury, zarehistravanyja ŭ krainach Jeŭrasajuza, pavinny abaviazkova mieć navihacyjnyja płomby. Akramia taho, płomby patrabujucca pry pieravozcy niebiaśpiečnych hruzaŭ.

Pry hetym isnujuć vyklučeńni: tranzit z rasijskaj Kalininhradskaj vobłaści, vialikahruznyja i ciažkavahavyja transpartnyja srodki sa śpiecyjalnymi dazvołami, pieravozka žyvioły, pošty, humanitarnaj dapamohi, tavaraŭ asabistaha karystańnia, a taksama ŭjezd praź biełaruska-rasijski ŭčastak miažy.

Prymianieńnie navihacyjnych płombaŭ u mižnarodnych pieravozkach Biełaruś pačała ŭ 2018 hodzie pa rasparadžeńni Łukašenki ab kantroli tranzitu. Sistema stała elemientam manitorynhu tavaraŭ pad mytnymi pracedurami i za apošnija hady tolki pašyraje śfieru vykarystańnia — u tym liku dla kantrolu pieravozak śpirtaŭtrymalnych i niebiaśpiečnych hruzaŭ.

Kamientary da artykuła