Madura baicca vysokadakładnaha ŭdaru
Pavodle danych haziety New York Times, jakaja pahutaryła ź siamiu asobami, nabližanymi da vieniesuelskaha dyktatara Nikałasa Madura, u jaho asiarodździ panuje «atmaśfiera napružańnia i zaniepakojenaści».
AP Photo/Matias Delacroix
Kab abaranicca ad mahčymaj kropkavaj ataki abo napadu śpiecnaza, Madura nie zatrymlivajecca ŭ adnym miescy i mianiaje mabilnyja telefony. Jon uzmacniŭ asabistuju achovu i praz strach zdrady bolš spadziajecca na ciełaachoŭnikaŭ z sajuznaj Kuby.
Bieły dom abvinavačvaje Madura ŭ tym, što jon staić na čale «narkaterarystyčnaha» kartela i zalivaje ZŠA narkotykami. Užo niekalki miesiacaŭ Vašynhton naroščvaje cisk na Vieniesuełu, kab prymusić Madura pakinuć krainu.
Dyktatar, pavodle danych Miami Herald, nie zhodny adpravicca ŭ vyhnańnie i patrabuje dla siabie nie tolki «poŭnaj amnistyi», ale i choča zachavać kantrol nad armijaj. Jak paviedamlajuć krynicy NYT, Madura ličyć, što vytrymaje cisk ZŠA i zachavaje ŭładu.
2 śniežnia prezident ZŠA Donald Tramp abviaściŭ, što hatovy da eskałacyi: «My budziem nanosić udary i na sušy. My viedajem, dzie jany žyvuć. My viedajem, dzie žyvuć zładziei, i my vielmi chutka pačniom».