Kiraŭnikom rasijskaj dyviersijnaj sietki ŭ Polščy byŭ uradženiec Ukrainy z pašpartam RF

Nacyjanalnaja prakuratura Polščy paviedamiła, što kiraŭnikom špijonska-dyviersijnaj hrupy, jakaja dziejničała ŭ intaresach rasijskaj raźviedki na terytoryi krainy, byŭ 28‑hadovy hramadzianin Rasii rodam z Ukrainy Michaił Mirharodski, piša vydańnie «Ahientstvo».

Michaił Mirharodski

Pavodle danych polskaj prakuratury, Mirharodski stvaryŭ i ŭznačaliŭ złačynnuju hrupu ŭ składzie jak minimum 30 čałaviek, jakaja zajmałasia špijanažam, dyviersijami i prapahandaj u intaresach Maskvy. Členam hrupy daručałasia:

• nazirać za vajskovymi abjektami;
• ustaloŭvać GPS-pierachopniki i pryłady dla pieradačy danych z abjektaŭ krytyčnaj infrastruktury (aeraporty, čyhunačnyja stancyi, vajskovyja abjekty, pamiežnyja pierachody na polska-ŭkrainskaj miažy);
• raspaŭsiudžvać prarasijskija, antyŭkrainskija i antynataŭskija ŭlotki;
• prymianiać fizičny hvałt, padpalvać i źniščać majomaść ukraincaŭ i biełaruskich dysidentaŭ;
• płanavać sychody z rejek ciahnikoŭ i inšyja akty dyviersij.

Dla finansavańnia svajoj dziejnaści Mirharodski vykarystoŭvaŭ kryptavalutu.

Michaiłu Mirharodskamu vystavili piać abvinavačvańniaŭ:

• stvareńnie i kiravańnie arhanizavanaj złačynnaj hrupaj;
• arhanizacyja dziejnaści zamiežnaj raźviedki;
• arhanizacyja zamachu na katastrofu na transparcie;
• padbuchtorvańnie da hvałtu i źniščeńnia majomaści;
• finansavańnie teraryzmu.

«Ahientstvo» daviedałasia, što Mirharodski naradziŭsia ŭ horadzie Śvietłavodsk Kiravahradskaj vobłaści Ukrainy, ale doŭhi čas žyŭ u Rasii i maje rasijskaje hramadzianstva.

Z 2008 pa 2014 hod jon žyŭ u Jamała-Nienieckaj aŭtanomnaj akruzie, dzie baćka Mirharodskaha pracavaŭ prarabam. Potym siamja pierajechała ŭ padmaskoŭnyja Bałašychu, a paśla Kašyru.

U Bałašysie Michaił Mirharodski žyŭ niepadalok ad centra hrupy śpiecnazu «Alfa» FSB, u susiednim ź im domie žyŭ były achoŭnik Viktara Janukoviča Siarhiej Škrabatoŭski.

Mirharodski źjaŭlajecca pastajannym klijentam bankaŭ i mikrafinansavych arhanizacyj i maje zapazyčanaść u 634 tysiačy rubloŭ (kala 8200 dalaraŭ). Pracavaŭ u «Tińkoff banku», administrataram u deviełapierskaj kampanii i śpiecyjalistam u inšaj kampanii.

Rasśledavańnie pa hetaj špijonskaj spravie pačałosia ŭ 2023 hodzie. Pa joj užo asudžanyja 16 čałaviek (12 ukraincaŭ, 3 biełarusy, 1 rasijanin). Jašče 8 čałaviek znachodziacca pad śledstvam (siarod ich rasijanin, 3 biełarusy, pa adnamu hramadzianinu Ukrainy, Polščy i Litvy).

Sudovyja pakazańni zaśviedčyli, što ŭdzielniki sietki atrymlivali vypłaty ŭ kryptavalucie:

• 5 USD — za raspaŭsiud listovak i nalepak;
• 300—400 USD — za ŭstanoŭku veb-kamier abo GPS-pieradatčykaŭ u stratehičnych miescach;
• 10 000 USD — za arhanizacyju schodu ciahnika z vajskovaj dapamohaj Ukrainie.

Kamientary da artykuła