Stała viadoma, chto ŭznačaliŭ Pałac respubliki zamiest siabruka Ejsmant, jaki pahareŭ na karupcyi
Paśla zatrymańnia Maksima Prychadoŭskaha kresła dyrektara Pałaca respubliki niekalki miesiacaŭ zastavałasia vakantnym.
Ciapier stała viadoma, što miesca zaniaŭ Mikałaj Maskaloŭ — jaho proźvišča źjaviłasia na aficyjnym sajcie ŭstanovy.
Raniej Mikałaj Maskaloŭ pracavaŭ na pasadzie prarektara Akademii kiravańnia.
Pieratasoŭka kadraŭ tam pačałasia ŭ kastryčniku — tady Łukašenka zamianiŭ rektara: zamiest byłoha namieśnika ministra infarmacyi Ihara Buzoŭskaha, jaki kiravaŭ VNU z červienia 2024 hoda i, vidavočna, nie spraŭdziŭ čakańniaŭ, tudy pryznačyli niadaŭniaha rektara Mahiloŭskaha dziaržaŭnaha ŭniviersiteta Dzianisa Duka.
Mikałaj Maskaloŭ. Fota: pac.by
Novy dyrektar Pałaca respubliki, u adroźnieńnie ad svajho papiarednika Prychadoŭskaha, dośviedu ŭ śfiery kulturna-hladackich imprez da pryznačeńnia zusim nie mieŭ. Zatoje moža pachvalicca bekhraŭndam dziaržaŭnaj słužby.
Pa infarmacyi Belpol, 45‑hadovy ŭradženiec Chocimska pracavaŭ va ŭstanovie materyjalna-techničnaha zabieśpiačeńnia Kiraŭnictva spravami Łukašenki. Taksama jon paśpieŭ papracavać u sakrataryjacie Savieta Respubliki.
Maskaloŭ žanaty na supracoŭnicy strachavoj kampanii «Pramtransinviest», u siamji vychoŭvajuć dźviuch dačok.
Što tyčycca Maksima Prychadoŭskaha, to ź jaho źniali ŭsie abvinavačvańni i navat padaryli novaje ciopłaje miesca — ciapier funkcyjanier pracuje ŭ Biełaviežskaj puščy. Pa jaho słovach, heta adbyłasia dziakujučy siabroŭstvu z pres-sakratarkaj Alaksandra Łukašenki Natallaj Ejsmant.