Kiraŭnik arhanizacyi litoŭskich pieravozčykaŭ asabista źjeździŭ u Biełaruś, kab abmierkavać situacyju z furami

Prezident nacyjanalnaj asacyjacyi aŭtapieravozčykaŭ Litvy Linava Erłandas Mikienas razam z pradstaŭnikami niekalkich pieravozčyckich kampanij na minułych vychadnych naviedaŭ Biełaruś. Pa jaho słovach, vizit byŭ ryzykoŭny, ale dazvoliŭ acanić realnuju situacyju na miescy, piša Delfi.lt.

Zdymak ilustracyjny. Fota: «Naša Niva»

U Biełaruś pajechali kiraŭniki troch litoŭskich kampanij, čyj transpart zastaŭsia ŭ krainie: Kšyštaf Sonhin (kampanija Sontransa), Ihnas Maciejunas (Koldlita) i Vitalus Hihiavičus (Kelruva).

Litoŭcy sustrelisia z pradstaŭnikami Biełaruskaj asacyjacyi mižnarodnych aŭtapieravozčykaŭ (BAMAP), abmiarkoŭvali ź imi situacyju, ale realnaha prahresu, jak śćviardžajecca, sustreča nie dała. Biełaruski bok prapanavaŭ tolki mahčymuju sustreču vice-ministraŭ i mahčymaść abmierkavać pieraraźlik apłaty za stajanki, kali budzie palityčny dyjałoh.

Daradca premjer-ministra Litvy Ihnas Dobravolskas adznačyŭ, što pajezdki ŭ Biełaruś ryzykoŭnyja i ich treba paźbiahać. Jon nahadaŭ, što Biełaruś utrymlivaje litoŭskija hruzaviki ŭ zakładnikach i moža prymianiać suprać Litvy terarystyčnyja mietady.

Delehacyja ź Litvy zajazdžała ŭ Biełaruś praź Miednicki KPP. Na litoŭskim baku nazirajucca doŭhija čerhi: hruzaviki stajać pa 36 hadzin, kiroŭcy stomlenyja. Zatoje ŭ Biełarusi — pustaja mytnia, transpartu niama, mytniki tolki nazirajuć i zdymajuć videa.

Na stajancy ŭ Katłoŭcy znachodzicca kala 400 litoŭskich hruzavikoŭ. Pa słovach Mikienasa, choć umovy na miescy dobryja (dušy, handlovyja miescy, dziažurnyja słužby), sens zastajecca toj samy — litoŭski transpart vymušany stajać na terytoryi Biełarusi, a kampanii ryzykujuć stracić majomaść, bo pa biełaruskim zakanadaŭstvie transpart, što staić bolš za 4 miesiacy, kanfiskujuć.

BAMAP paviedamiła litoŭskaj delehacyi, što ŭ Biełarusi znachodzicca 1880 litoŭskich hruzavikoŭ i 2500—3000 paŭpryčepaŭ.

Mikienas padkreśliŭ, što siarod pieravozčykaŭ uzmacniajecca napružańnie i rastuć pratesnyja nastroi. Jon zaklikaje arhanizavać mirnuju akcyju, kab pryciahnuć uvahu ŭrada i hramadstva i nakiravać enierhiju ŭ kanstruktyŭnaje rečyšča.

Jon adznačyŭ, što havorka idzie pra realny transpart małoha biznesu, krynicu dachodaŭ siemjaŭ i realnuju ryzyku straty majomaści, tamu nieabchodna jak maha chutčej znajści efiektyŭnaje vyrašeńnie situacyi.

Kamientary da artykuła