Jak vieniesuelskija bandy i afrykanskija džychadzisty zavalvajuć Jeŭropu kakainam

Vieniesueła stała klučavym tranzitnym chabam dla kałumbijskaha kakainu, jaki masava idzie ŭ Jeŭropu praz krainy Sachielu. Abjomy kanfiskacyj kakainu ŭ Jeŭropie ciapier pieravyšajuć paŭnočnaamierykanskija. Z padrabiaznaściami znajomić The Wall Street Journal.

Partyja kakainu, kanfiskavanaja Bierahavoj achovaj ZŠA. 19 listapada 2025 hoda. Fota: AP Photo / Rebecca Blackwell

Za apošnija hady Kałumbija rezka naraściła vytvorčaść kakainu, i tradycyjnyja šlachi kantrabandy akazalisia pierahružanymi. Jak kažuć pradstaŭniki pravaachoŭnych orhanaŭ, heta prymusiła sietki šukać novyja «vokny» — i Vieniesueła akazałasia najbolš zručnaj.

Kantrabandysty karystajucca stratehičnym stanoviščam krainy, jaje praciahłaj bierahavoj linijaj i nieefiektyŭnaściu orhanaŭ biaśpieki. U Vieniesuele faktyčna niama ni płantacyj koki, ni bujnych łabaratoryj finalnaj apracoŭki.

Kałumbijskija kantrabandysty zavoziać kakain u krainu pa sušy, i dalej jon pieravozicca ŭ Afryku lohkimi samalotami, rybackimi łodkami, paŭpadvodnymi sudnami i hruzavymi karablami. U schiemach, pavodle śledčych, udzielničajuć i karumpavanyja vajskoŭcy.

Afrykanski etap

Kali hruz prybyvaje ŭ Zachodniuju Afryku, jon traplaje ŭ zonu ŭpłyvu sietak, źviazanych z uzbrojenymi isłamisckimi hrupoŭkami. U paŭnočnym Mali, pavodle byłych i ciapierašnich paŭstanckich lidaraŭ, kantrabandysty supracoŭničajuć z hrupami, afilavanymi z «Al-Kaidaj»: tyja supravadžajuć kałony, biaruć «płatu za prajezd» i faktyčna achoŭvajuć maršrut praz Sachiel.

Były aficer amierykanskaj vajennaj raźviedki Chiesus Ramera tłumačyć:

«Kakain 1980‑ch — nie toje samaje, što my bačym siońnia. Jość pramyja suviazi z terarystyčnymi arhanizacyjami, kab padtrymlivać ich dziejnaść».

Dalej šlach idzie praz Sacharu ŭ Ałžyr, Maroka, Liviju. Pavodle dakładu AAN za 2024 hod, u Livii prarasijskaja hrupoŭka biare płatu za tranzit kakainu ź Nihiera ŭ Jehipiet. Dalej hruzy praź Mižziemnaje mora traplajuć u Paŭdniovuju Jeŭropu.

Jeŭropa — hałoŭny rynak

Pavodle Upraŭleńnia AAN pa narkotykach i złačynnaści, abjomy kanfiskacyj kakainu ŭ Jeŭropie ciapier pieravyšajuć paŭnočnaamierykanskija. Heta vynik i rostu pastavak, i vysokaha popytu.

Ekśpiert InSight Crime Džeremi Makdermat adznačaje:

«Kolkaści nastolki vyraśli, što hałoŭnaja prablema dla tradycyjnych sietak — jak ich uvohule pieramiaścić».

Inšyja ekśpierty adznačajuć, što akramia Vieniesueły vialikija partyi kakainu iduć taksama z Brazilii, Hajany i inšych krain.

Maršrut praź Vieniesuełu ŭžo daŭ sieryju rekordnych kanfiskacyj. U vieraśni minułaha hoda dva pryvatnyja samaloty Gulfstream z kakainam uźlacieli ź impravizavanaj uźlotnaj pałasy ŭ štacie Apure na miažy z Kałumbijaj. Adzin ź ich zatrymali ŭ Hviniei-Bisaŭ z 2,6 tony kakainu — heta rekord dla krainy, viadomaj jak narkachab. Druhi dabraŭsia da Burkina-Faso, dzie dziejničajuć isłamisckija bajeviki.

Zachodnija čynoŭniki kažuć: ź Vieniesueły ŭ Zachodniuju Afryku lataje jak minimum adzin narkarejs na tydzień. Kab schavać maršruty, piłoty vyklučajuć transpondary, a dyśpietčaraŭ padkuplajuć, kab tyja vyklučali sistemy adsočvańnia.

Akramia avijakanałaŭ, pracujuć i marskija maršruty. Dziakujučy karupcyi ŭ partach i na ŭźbiarežžy ź Vieniesueły rehularna vychodziać sudny, što nakiroŭvajucca ŭ Partuhaliju, Ispaniju dy dalej pa Jeŭropie.

U śniežni 2024‑ha Ispanija kanfiskavała 3,3 tony kakainu na vieniesuelskim rybackim sudnie kala Kanarskich astravoŭ. Raniej ułady Irłandyi pierachapili sudna MV Matthew z 2,2 tony kakainu na borcie. Heta była najbujniejšaja partyja narkotyku ŭ historyi krainy. Śledstva ličyć, što hruz byŭ zahružany ŭ vodach pablizu Vieniesueły.

Kałumbijskija dylery karystajucca i paŭpadvodnymi sudnami, jakija vychodziać ź Vieniesueły ŭ bok Ispanii. U listapadzie partuhalskaja palicyja zatrymała adno z takich sudnaŭ z 1,7 tony kakainu. Na borcie byŭ vieniesuelski ekipaž.

Supracoŭniki antynarkatyčnych słužbaŭ zajaŭlajuć pra ŭsio bolšuju kolkaść prykmiet udziełu Vieniesueły ŭ jeŭrapiejskim narkahandli. Ispanskaja palicyja niadaŭna zatrymała 13 členaŭ vieniesuelskaj bandy Tren de Aragua, što stała pieršym vypadkam u Jeŭropie.

Baraćba z trafikam

Administracyja ZŠA ŭzmacniła cisk na ŭłady Vieniesueły, abvinavačvajučy režym Nikałasa Madura ŭ datyčnaści da narkatrafiku — Madura heta admaŭlaje. U Vašynhtonie zajaŭlajuć, što nanosiać udary pa sudnach, jakija nibyta viazuć narkotyki, u tym liku ź Vieniesueły. Dziaržsakratar Marka Rubia abhruntoŭvaje apieracyi tym, što Vieniesueła — tranzitny vuzieł, i zajaŭlaje, što jeŭrapiejcam varta nie krytykavać hetyja dziejańni, a być za ich udziačnymi.

Jeŭrapiejskija siłavyja struktury ŭzmacnili supracoŭnictva z afrykanskimi krainami, ale abjomy pastavak rastuć chutčej. U Sachieli situacyju ŭskładniła sieryja vajskovych pieravarotaŭ, paśla jakich supracoŭnictva z Zachadam častkova razvaliłasia.

Na hetym fonie patoki kakainu praź Vieniesuełu i Zachodniuju Afryku praciahvajuć raści. Jak adznačajuć daśledčyki AAN pa narkotykach, razam z pastaŭkami raście i spažyvańnie: kakain usio čaściej stanovicca masavym nie tolki ŭ Amierycy i Zachodniaj Jeŭropie, ale i ŭ rehijonach, dzie raniej jon byŭ marhinalnym — ad Aŭstralii da Uschodniaj Jeŭropy.

Kamientary da artykuła