Znajšli kažana ŭzimku — nie prachodźcie mima!

Navat kali źviarok lažyć nieruchoma i padajecca miortvym, u jaho jašče jość šaniec vyžyć, i jamu treba dapamahčy, piša telehram-kanał «Dzikaja pryroda pobač».

Poźniaj vosieńniu kažany šukajuć sabie prytułku, jaki padychodzić dla zimovaj śpiački, i mohuć źjavicca ŭ padjezdach, kvaterach i na bałkonach. U marazy ich niaredka znachodziać prosta na ziamli ŭ stanie nieprytomnaści.

Jak dapamahčy takomu kažanu?

• Nie panikujcie. Dla kantakta z kažanom nadzieńcie ščylnyja palčatki abo izalujcie ruki ad mahčymaha ŭkusu pry dapamozie ščylnaj tkaniny abo adzieńnia.
• Akuratna pamiaścicie kažančyka ŭ skryniu ź nievialikimi dzirkami.
• Źviarniciesia ŭ Minski centr reabilitacyi rukakryłych «Kažanapolis»: +375 29 213 92 57 (A1, Viber, Telegram, WhatsApp). Vas prakansultuje chirapterołah Alaksiej Špak z NAN Biełarusi.

Kali vy ź Minska ci vakolic, centr moža pryniać kažana na kamfortnuju zimoŭku, a viasnoj jaho vypuściać na volu. Kali ž vy ź inšaha rehijona, to vam padkažuć, jak dapamahčy źviarku.

Kažany nie źjaŭlajucca pahrozaj dla ludziej: jany nie ahresiŭnyja i sami nie napadajuć.

Usie kažany ŭ Biełarusi znachodziacca pad achovaj dziaržavy, i zabivać ich nielha. A vosiem vidaŭ ź i ich uklučanyja ŭ nacyjanalnuju Čyrvonuju knihu.

Kažany žyvuć u siarednim da 15 hadoŭ, choć niekatoryja asobiny — našmat daŭžej. Adzin kažan-vieteran pražyŭ 43,5 hoda. Heta była načnica Branta — vid, jaki sustrakajecca i ŭ Biełarusi.

Kamientary da artykuła