Što źmienicca ŭ pracy maršrutak — asnoŭnyja novaŭviadzieńni
Na peŭnych maršrutach puściać bolšyja aŭtobusy, aŭtaparki abnoviać i zapuściać novuju sistemu kupli kvitkoŭ anłajn.
Fota: LookByMedia
Budučyja źmieny abmiarkoŭvali na kruhłym stale ŭ Breście 19 listapada, paviedamlaje «Respublika».
Bolš źmiaščalnyja aŭtobusy i chutkasnyja maršruty
Na peŭnych maršrutach, kab pieravozić bolš pasažyraŭ, zamiest transpartu katehoryi M2 źbirajucca puścić bolš źmiaščalny transpart katehoryi M3 (aŭtobusy M2 majuć masu da 5 ton, a M3 — zvyš 5 ton i bolš pasadačnych miescaŭ).
Płanujuć i chutkasnyja aŭtobusy.
Štohod praduhledžanaje abnaŭleńnie parku hramadskaha transpartu nie mienš za 10 pracentaŭ.
«U ramkach hetaha abnaŭleńnia my pieravažna kuplajem M3. Pieršaja zadača, jakaja ciapier abmiarkoŭvajecca, — na doŭhija adlehłaści zamianić maršrutki ruchomym sastavam M3. Heta bolš kamfortny, nadziejny, biaśpiečny vid transpartu», — adznačyŭ namieśnik ministra transpartu i kamunikacyj Siarhiej Dubina.
Zaviaršyć abnaŭleńnie płanujuć da 2030 hoda.
Naprykład, u Bresckaj vobłaści ŭ 2025‑m budzie zakuplena bolš za 100 adzinak ruchomaha sastavu, aŭtapark Bresta ŭ tym liku papaŭniajecca 15 tralejbusami z pavialičanym aŭtanomnym chodam.
Kvitki buduć pradavać i ŭ kasach, a nie tolki anłajn
Bilety na rejsy pavinny pradavacca i ŭ kasach aŭtastancyj, a nie tolki anłajn.
«Heta praduhledžana ŭ praviłach pieravozak, ale nie ŭsie pieravozčyki imi kirujucca. Nam paskardzilisia, što na aŭtavakzale Minska nielha nabyć bilety ŭ bok Mahilova. Čamu my źniščajem biletnyja terminały?» — zaŭvažyŭ dyrektar Mahiloŭskaha abłasnoha centra kiravańnia transpartam Ihar Mažaroŭski.
Jon patłumačyŭ, u čym bačyć prablemu ciapierašniaj sistemy kupli kvitkoŭ anłajn.
«Mahiloŭ ź Minskam štodzionna źviazvajuć 120 rejsaŭ, a taksama 40 rejsaŭ ad minskaha apieratara. Pry takoj kolkaści isnuje prablema źjechać u našym kirunku. Bilety na vychadnyja branirujucca z paniadziełka — na piać-šeść rejsaŭ, adzin u adnaho i hetak dalej. Potym nie vykuplajucca. U vyniku častka maršrutak idzie ŭ rejs z pustymi miescami pry adsutnaści biletaŭ u prodažy ŭžo ŭ pačatku tydnia. Kankurentnaść ciapier nie tolki na darohach, ale i ŭ internecie, treba navodzić paradak».
Płanujecca, što ŭ Biełarusi da 1 traŭnia 2027 hoda budzie stvoranaja adzinaja sistema braniravańnia i prodažu biletaŭ na aŭtobusy i maršrutnyja taksi.
Jana zrobić bolš zručnym praces apłaty prajezdu, a taksama abjadnaje roznyja apłatnyja mietady ŭ ramkach adnoj płatformy.
Transpart da haradoŭ-spadarožnikaŭ
Da haradoŭ-spadarožnikaŭ žycharoŭ treba budzie dastaŭlać ź intervałam u 20—30 chvilin.
U Minsku prablema ź niedastatkovaj źmiaščalnaściu aŭtobusaŭ na takich rejsach.
Z Bresta ŭ horad-spadarožnik Žabinku dajechać za hety čas možna: akramia maršrutnych taksi, jość haradski aŭtobus i čyhunka.