U Śvietłahorsku ŭ nielehalnaj stamatałahičnaj klinicy pacyjentam lačyli zdarovyja zuby
Bolšaja častka klijentaŭ — dzieci.
Ilustracyjnaje fota
U Śvietłahorsku supracoŭniki Žłobinskaha mižrajonnaha adździeła finansavych rasśledavańniaŭ raskryła niezakonnuju dziejnaść pryvatnaha pradpryjemstva, jakoje akazvała miedycynskija pasłuhi bieź licenzii. Historyju padrabiazna apisvaje viedamasny časopis KDK «Dziaržaŭny kantrol», paviedamlaje Onliner.by.
Infarmacyja pra psieŭdakliniku źjaviłasia ŭ apieratyŭnikaŭ u krasaviku 2024 hoda. Pravierka paćvierdziła: pradpryjemstva sapraŭdy viali dziejnaść bieź jakich-niebudź dazvołaŭ.
U pamiaškańniach vyjavili stamatałahičnyja ŭstanoŭki, abstalavańnie dla ultrahukavoj dyjahnostyki i navat čarnavikovyja zapisy ź imionami klijentaŭ. Mnohija ź ich paźniej pryznalisia, što prachodzili tam lačeńnie, upeŭnienyja, što źviartajucca ŭ lehalnuju kliniku.
Kantralory ŭstanavili, što z 2023 pa 2024 hod u nielehalny kabiniet źviarnulisia nie mienš jak 100 čałaviek. Asabliva tryvožyć, što bolšaja častka klijentaŭ — dzieci. Baćki, bačačy darahoje abstalavańnie, nie padazravali, što pierad imi pradpryjemstva bieź licenzii.
U chodzie pravierki vyśvietliłasia, što ŭ «klinicy» pravodzili pracedury bieź miedycynskich pakazańniaŭ i navat lačyli zdarovyja zuby.
Pa vynikach pravierki zaviedziena kryminalnaja sprava. U joj prachodziać dva čałavieki: dyrektar i zasnavalnik pradpryjemstva, a taksama indyvidualny pradprymalnik, jaki ŭdzielničaŭ u niezakonnaj dziejnaści. Śledstva ŭstanaviła, što dachod parušalnikaŭ skłaŭ nie mienš za 57 tysiač rubloŭ. Hetyja srodki padlahajuć spahnańniu ŭ biudžet.