Z pačatku poŭnamaštabnaj vajny Jeŭrasajuz zapłaciŭ Rasii na 124 miljardy jeŭra bolš, čym vydzieliŭ na padtrymku Ukrainy

Ministarka zamiežnych spraŭ Šviecyi Maryja Malmier Stenerhard paviedamiła, što ad pačatku rasijskaha poŭnamaštabnaha ŭvarvańnia va Ukrainu krainy Jeŭrasajuza zapłacili Rasii za impart tavaraŭ i enierharesursaŭ na 124 miljardy jeŭra bolš, čym vydzielili dapamohi Ukrainie, piša «Jeŭrapiejskaja praŭda».

Maryja Malmier Stenerhard. Fota: AP Photo/Geert Vanden Wijngaert

Pavodle słoŭ šviedskaj ministarki, padtrymka Ukrainy z boku ES składaje kala 187 miljardaŭ jeŭra, u toj čas jak impart rasijskaj nafty i hazu dasiahnuŭ 201 miljarda. Razam ź inšymi tavarami ahulny abjom impartu z Rasii — 311 miljardaŭ jeŭra. Heta, na dumku ministarki, aznačaje «niehatyŭnuju padtrymku» Ukrainy na 124 miljardy. Jana nazvała takuju situacyju haniebnaj i prademanstravała žurnalistam hrafik.

Stenerhard padkreśliła, što biez pavieličeńnia dapamohi Ukrainie i ŭzmacnieńnia cisku na Rasiju nie varta čakać paŭnavartasnych mirnych pieramovaŭ. Jana taksama adznačyła, što dobrym krokam było b vykarystańnie zamarožanych rasijskich aktyvaŭ u intaresach Ukrainy.

Tym časam Rasija ŭžo rychtujecca da mahčymaj kanfiskacyi jaje zamarožanych aktyvaŭ u Jeŭropie. Prezident Ukrainy Uładzimir Zialenski zaklikaŭ ES pieraadoleć roznahałośsi nakont ich vykarystańnia, padkreślivajučy, što novaje finansavańnie nieabchodnaje dla dalejšaha supraćstajańnia Maskvie. Raniej praces tarmaziła pazicyja Bielhii, na terytoryi jakoj znachodzicca bolšaja častka rasijskich aktyvaŭ u ES.

U Brusieli adznačyli, što pytańnie zastajecca aktualnym, a kančatkovaje rašeńnie płanujuć pryniać u śniežni 2025 hoda.

Kamientary da artykuła