Litva nie budzie kampiensavać straty pieravozčykaŭ, jakija zachraśli ŭ Biełarusi
«Heta nie my ich trymali, ich trymaŭ biełaruski režym».
Ministr transpartu Litvy Juras Taminskas zajaviŭ, što ŭrad nie budzie kampiensavać straty pieravozčykaŭ, jakija zachraśli na miažy ź Biełaruśsiu, piša LRT.
Juras Taminskas zajaviŭ, što ŭrad nie maje namieru pakryvać straty pieravozčykaŭ, źviazanyja z časovym zakryćciom pamiežnych punktaŭ ź Biełaruśsiu, — «navat dyskusii takoj niama».
Na jaho dumku, papiaredžańni ŭładaŭ ab ryzykach nie pieraškadžajuć hetamu biznesu praciahvać dziejnaść na ŭschodnim kirunku.
«Vidavočna, što jany ŭsio roŭna jechali, jeździać i buduć jeździć — heta nie źmienić ich mierkavańnie i ich pavodziny. Kali jany publična zajaŭlajuć, što praciahvajuć pracavać va ŭschodnim napramku, to čamu tady treba patrabavać ad dziaržavy pakryvać paniesienyja straty?» — skazaŭ Taminskas.
Ministr padkreśliŭ, što pytańnie ab kampiensacyi strat nie razhladajecca. «Heta nie my ich trymali, ich trymaŭ biełaruski režym», — zajaviŭ Taminskas.
Pa słovach Taminskasa, pra hibrydnuju ataku Minska suprać Litvy paviedamlali jašče za tydzień da zakryćcia miažy, tamu biznes musiŭ acanić ryzyku taho, što «jedzie da dziaržavy-ahresara».
Siońnia Litva adkryła miažu ź Biełaruśsiu, zakrytuju ŭ kancy kastryčnika ŭ adkaz na hibrydnyja ataki ŭ boku Biełarusi.