Na novym moście ŭ Mazyry, jaki adkryvaŭ Łukašenka, padśviatleńnie pratrymałasia tolki niekalki dzion

Novy aŭtamabilny most praz Prypiać u Mazyry, jaki niadaŭna ŭračysta adkryvali z udziełam Alaksandra Łukašenki i jaki šmat chvalili dziaržaŭnyja ŚMI, chutka straciŭ svaju «vizitoŭku» — jarkaje padśviatleńnie, piša «Fłahštok».

Takim most byŭ tolki niekalki dzion paśla adkryćcia. Fota: «Płanieta Biełaruś»

Jak paviedamlajuć miascovyja žychary, užo praź niekalki dzion paśla adkryćcia abjekta padśviatleńnie arki mosta i aśviatleńnie leśvic byli adklučanyja, nie pracujuć i lifty. Zastałosia tolki standartnaje aśviatleńnie ŭzdoŭž prajeznaj častki.

U sacsietkach ludzi aburajucca: kažuć, što «pakazucha skončyłasia» i most ciapier vyhladaje zvyčajna, choć raniej padśviečanaja kanstrukcyja pryciahvała šmat uvahi.

Ź vialikaj kolkaściu ludziej na moście, darečy, uźnikali i prablemy — miascovyja žychary adznačali, što padčas masavych fotasiesij i špacyraŭ padletkaŭ na im chutka źjaviłasia šmat śmiećcia, a na aśvietlenaj arcy — ślady ad abutku tych, chto sprabavaŭ na jaje zaleźci.

Paśla hetaha milicyja vystupiła z papiaredžańniem: zaklikała «bieražliva stavicca da abjekta», nahadała pra adkaznaść za psavańnie majomaści, paraiła baćkam vieści razmovy ź dziećmi pra niedapuščalnaść vandalizmu i paviedamlać pra «padazronyja hrupy» na moście. Asobna padkreślili, što nielha stanavicca na parenčy i dekaratyŭnyja elemienty.

Na hetym fonie miascovyja žychary miarkujuć, što padśviatleńnie i lifty mahli śviadoma vyklučyć, kab ludzi nie źbiralisia na moście viečarami. Pry hetym jany nahadvajuć, što niepadalok jość haradski park, jaki ŭ ciomny čas sutak praktyčna nie aśviatlajecca.

Kamientary da artykuła