Słovy pinskaha čynoŭnika prymusili mnohich uspomnić recept samaj smačnaj stravy. «Fłešbek u dziacinstva!»
Pahladzieŭšy rolik pra vice-mera Pinska Dźmitryja Pałchoŭskaha, jaki siarod samych smačnych straŭ, jakija varta pakaštavać turystu na Pinščynie, nazvaŭ «tovkanyciu», ludzi pačali zhadvać, jak hetuju stravu hatujuć u ich miascovaści, i ŭdakładniać recepty.
Ilustracyjny zdymak z sacyjalnych sietak
«Taŭkanica — heta nie prosta piure!»
«Tovkanycia…. Babula zaŭsiody hatavała, kali pryjazdžała da jaje ŭ hości», — z nastalhijaj zhadvaje adna hladačka. I jaje łajkami padtrymała amal 550 inšych.
«Maja babula taksama tak nazyvała — tovkanica. Jana ź Ivanava», — dadaje inšaja.
«Maja z Moładava. Ivanaŭski rajon», — udakładniaje aŭtarka dopisu.
Hledačy zhadvajuć varyjanty hatavańnia i padačy hetaj stravy:
«Tovkanycia… Adno słova mianie viarnuła ŭ dziacinstva. Na kanikułach u babuli ŭ Ivanaŭskim rajonie. Heta nie prosta toŭčanaja bulba, heta KARTOPLI TOŬČANYJA I ZASMAŽANYJA ŠKVARKAMI Z CYBUCHAMI. Pach ad hetaj stravy nadzvyčajny».
«Fłešbek u dziacinstva atrymaŭ ad słova «tovkanycia». Babula tak nazyvała. Tovkanycia sa skvarkami, z cybulaj i kubak kisłaha małaka».
«Z barščom z kvašanaj kapusty z hrybami sušanymi ŭvohule bomba. Smačniej, chiba što, niama».
«My bližej da Biarozy Bresckaj vobłaści žyviom. I ŭ nas tovkanyca — heta toŭčanaja bulba z zasmažanym sałam i cybulaj. Vielmi smačna».
«Tovkanycia — heta varanaja toŭčanaja bulba z skvarkami i cybulaj smažanaj. Možna źvierchu pasypać kropam śviežym».
Ź piečy — sama smačna
Hledačy śćviardžajuć, što asablivy smak bluda dadaje jaho pryhatavańnie ŭ piečy:
«I nie prosta toŭčanaja bulba, a potym jašče ŭ piečy zapiečanaja z zažaračkaj. Heta vielmi smačna».
«Tovkanycia — heta nie prosta toŭčanaja bulba! Piure sa skvarkami i cybulaj u pieč. I źvierchu ŭtvarajecca skarynačka rumianaja. Mmmm, smakata».
«Varanuju bulbu zapraŭlali smažanym sałam z skvarkami i cybulaj. Rabili piure, jakoje składvali ŭ vialikuju hłybokuju hlinianuju misu z nakryŭkaj i ŭ pieč tamicca… Smak dziacinstva, Biarozaŭski rajon».
Šmat chto śćviardžaje, što tovkanycia ź piečy — samaje smačnaje strava:
«Heta takaja smakata, kali ź piečy dastanieš, dy jašče z kisłaj kapustaj».
«Samaja smačnaja ježa — heta tovkanica. Asabliva ŭ piečy jakaja staić. Heta nie apisać, jak smačna».
«(…) Vielmi smačna. Asabliva, kali jaje ŭ piečy zapiačy. Smačniej nie prydumaješ».
«Nie prosta toŭčanaja, a z cybulaj i skvarkaj, dy jašče [kali] ŭ piečy pastaić, dy skarynačkaj paryjecca. Mmm. Ślinaj možna padavicca».
Nie piure
«Kala ja pravilna zrazumieła, havorka idzie pra bulbianoje piure», — zaŭvažaje hladačka, i dadaje, što ŭ jaje miascovaści, što za 60 kiłamietraŭ ad Pinska, hetu stravu nazyvajuć «taŭpienia».
«Nie. Dadajuć tłustaje miasa i biez małaka ci vady», — papraŭlajuć jaje.
Pra toje, što nie treba błytać piure i tovkanyciu, davodziać i inšyja:
«Piure robiać z małakom i masłam. [A hetuju stravu] ŭ nas nazyvajuć «kamiaki». Jany robiacca z zažarkaj. Heta vielmi smačna».
«Piure i tovkanyca — asobnyja stravy».
«A ŭ nas nazyvajuć …»
U kamientaryjach — sapraŭdnaja pieraklička pamiž hledačami. Jany dzielacca nazvami hetaj stravy ŭ roznych miascovaściach.
«Maje baćki nazyvali heta taŭkienia».
«I ŭ nas tak, u Bresckim rajonie».
«Vioska kala Biełaazierska — tovkenia».
«Tovkanycia (piure, bulba) — Kamianiecki rajon».
«U nas taŭkučka nazyvajecca pa vioskach».
«Ja z Kobrynskaha rajona. I ŭ nas «tovkanycia».
«A ŭ nas kažuć «kaŭma».
«Tovkanica. Łuniniecki rajon».
«Tak. U nas u vioscy, Bresckaja vobłaść, Žabinkaŭski rajon, takaja strava była i taksama nazyvałasia».
«U nas u Rečyckim rajonie nazyvali «kamy» hetu stravu. Vielmi lubiła, kali babula jaje hatavała. A pach stajaŭ — abałdzieć».
«Chto tut naradziŭsia i vyras, usie zrazumieli»
«A što tut składanaha i niezrazumiełaha?», — dzivicca jašče adzin hladač. I tłumačyć: «U Pinsku — tovkanycia, u Minsku babula miatankaj heta nazyvała. Ale heta nie prosta toŭčanaja bulba, a bulba toŭčanaja z padsmažanymi drobnym skvarkami z cybulaj biez dadatku masła i małaka».
«Chto žyvie ŭ Biełarusi, chto tut naradziŭsia i vyras, usie zrazumieli, što za strava!!!» — reziumuje inšy.
Čytajcie taksama:
Drać ci tarkavać? Kapać ci vybirać? Raźbirajemsia ŭ biełaruskaj bulbie
Taŭkanica, kryšany, harbuzovaja kaša dy inšyja kulinarnyja radaści dziacinstva ŭ Drahičynie